Zo Re-unification Organisation huaihawtin vawiin khan Ramri Zokhawthar leh Vaphaiah Ramri hung duh loh leh Zalen taka ram pahnihte inkalpawh theihna Free Movement regime hlih duh lohna lantir nan Peacefull rally neih a ni.
R Sangkawia, ZORO Gen Hqrs President chuan Ramri hung duh loh leh FMR thiah duh loh chu Zofate’n thinlung tak taka ngaihtuah a ngaih thu sawiin ‘India, Myanmar leh Bangladesh-a awm te chu thlah khat unau dam leh tlangkhatah thih leh ruamkhata titute kan nih avangin engtikawng zawng mahin thenhran theih kan ni lo’ a ti a, India sorkarin chatuana inthenhrang tawh tura ramri hung leh FMR thiah chu UNO thu kalh tlat a nih thu sawiin vawiina punkhawm chuan an dikna chanvo an humhalh a ni tih a lantir tih a sawi bawk.
ZORO Vice President Lalmuanpuia Punte, Adviser to Chief Minister ni bawk chuan British-in ramri a phuah chawp hung tumna leh zalen taka inkalpawhna thiah tumna chu a lungchhiat thlak tak zet tih sawiin hei hian India sorkar hian British thu a awihin British rorel an pawm hle tih a ti lang niin a sawi. Ramri hung chu Mizo mipuiin an duh lo a, Party hrang hrangin an dodal a, Assembly House-ah pawh pass a nih thu sawiin chu chu India Sorkarin hria se a duh thu a sawi a, hnam khat thisen inzawmte then hrang tura hmalakna chu India Sorkar hian ti tawp mawlh rawh se tih chu an duh dan a nih thu a sawi bawk.
Lt. Col. Clement Lalhmingthanga, Champhai South bialtu MLA pawhin thu sawiin ram chuan ri nei mah se, hnam chuan ri a nei lo a, unau inkara hem thlak a, daidan tuma India sorkar hmalakna chu ram pahnihna Mizo mipuite’n an dodal a ni tih hi India Sorkar laipuiin hriatpui ngei se an duh thu a sawi bawk a ni.
C Liankunga, Hualngoram Peoples Organisation Vice President pawhin thu sawiin Unau thenhran tumna aia dan bawhchhiatna lian a awm lo a, unau thisen inzawmte thir pal phena inchibai rapthlak zia a takin kan tem mek a, Barh luih ramri hung tumna chu a tawp thlengin an do dawn tih a sawi bawk.
Vawiin hian L Ramdinliana Renthlei, ZORO General Secretary, SYMA Champhai President F Lalrinmuana, Zokhawthar YMA President Ramtharnghaka, MNF thalai GS Pu Zodintluanga leh ZPM Gen. Hqrs GS Saithuama te’n thu an sawi ve bawk a ni.
Vawiin hian India leh Myanmar inrina Zokhawthara Lei bulah Mizoram mipuite pungkhawmin Chin State, Khawmawi mipuite chu Tiau Lei-ah an pungkhawm bawk a, Kalkhawm mipuite chuan FMR thiah leh ramri hung tumna chu an duh loh thu an au rualpui a, thu ziak chi hrang hrang Unau kan ni, inthen thei kan ni lo tih te, FMR hlih kan duh lo tih te, ramri hung kan duh lo tihte an keng a ni.
Vawiin vek khan Vaphaiah pawh ZORO huaihawt hian Ramri hung tumna leh Ram pahnih mipuite Zalen taka in kal pawh theihna Free Movement Regime hlih duh loh lantirna atan Peacefull Rally hi neih a ni a, ZORO Vice President Rohmingthanga hoin rally hi neih a ni.
Vawiin vek hian Manipur Tengnopal District-ah ZORO Gen Hqrs huaihawtin Kuki Inpi leh Kuki Students Organisation-te’n rally an buatsaih bawk a ni.
