June 29, 2024 : Nimin tlai khan Zokhawthar Police-te hian Immigration Check Post-ah random checking neiin Myanmar lam atana Mizoram lama rawn lut mi pakhat chu ringhlelin dap an tum laiin tlanchhiat a tum a, Police-te hian man hmanin a ipte-pui ah chhunga heroin Hawng 22, Gram 256 a rit an man a, ruihhlo tawlha in hnamhnawih dang hi chhui zuin Myanmar atanga heroin rawn keng luttu-in a hlan chhawn tur hnam dang mi pahnihte chu Melbuk daiah an man zui leh bawk a ni.
Heroin rawn keng luttu Thianchhinsanga, Khawmawi Myanmar ni-a insawi leh a hlan chhawn tur Promen Roy, Ahah Hussain, Silchar ni-a insawi te chu Zokhawthar Police Station-ah ND&PS Act hmanga thubuai siamsak an ni.
Zokhawthar Police-te Heroin man rih zawng hi commercial Quantity-a hlawma ruihhlo tawlhna a tlin phak avangin a neitua puhte hi Court-in thiam loh a chantir a nih chuan kum 10 atanga kum 20 thleng Lung in tang tur leh pawisa chawi tura hrem theih an ni.
Nimin tlai vek khan Zokhawthar Police leh 42 Assam Rifles tangkawpte chuan Melbuk daiah Joint Operation neiin Zokhawthar atanga Champhai lam pan Taxi pakhata chuang Lalrokimi, Sairang Dinthar ni-a insawi hnen atangin Heroin hawng 7, Gram 80-a rit an man a, a neitua puh hi ND&PS Act hnuaiah thubuai siamsak a ni.
Heroin neitua puh mi pathumte hi vawiin khan Champhai District Court-ah hruai an ni a, Lung inah khung nghal an ni.
