Pu Zionnghaka chu Ningani, June ni 17 khan a zalna tur hmun an buatsaih, Chhuan Thar Stadium bula hmun pawimawh laiah vuiliam a ni. An vuina thlalak hi hla tak a mi a nih loh chuan hmuh tur a awm miah lo. A nupui fanaute leh a u leh nauten an lakpui pawh hmuh tur a awm lo bawk.
Official in video-in vuina inkhawm chu an cover ve tawk a. A vuinaah hian media te luh an phal lo bawk. Hemi chungchang hi Pu Ziona nau Chhunga chuan sawifiahin, “Ziona hian sorkar dan a ngai pawimawh a, hrileng kaihhnawiha inkaihhruaina chu a duhdan angin zawm a ni a. Mihring punkhawm tlem theih dan ber tura kalpui a ni a. Mi 30 aia tam punkhawm loh tih chu an dinhmun enin an hlen thei lo mai zawk.”
“A damlai khan Pu Ziona hian mitthi thlalakpui leh vuinaa thlalak tih vel hi a duh ngai lo. ‘An hlim lai hmel te, an nui hmelte hi kan hriatrengna hnuhnung berah tang se a duhawm zawk e,’ a ti thin a. Hei vang hian a vuina thlalak a awm lova, a chhungte leh a thenrualte chuan thla an lakpui miah lo bawk a. Vuinaah hian mobile phone leh thlalakna dang ken luh chu an remtih loh phah.” tiin Maipawl a hrilh.
A chanchin ziahna kan dawna tarlan a nih danin Pu Ziona hi hun rei tak chhung zunthlum natnain a lo tlakbuak tawh a. Taksa sawizawi leh damdawia inenkawlna avangin hnathawh a thulh phah ngai chuang lova. Kum 2021 June thla tir atang khan a nuamsam lo tan a. Ni 8 ah khan hrawkna damdawi la turin a chhuak peih a, chumi nia a haw chu a bawksawp chhovin a harh ta meuh lova. Hrileng avangin inentir tura Aizawl pan a remchan loh avangin phone hmangin doctor an rawn a, a tha thei meuh lo.
Zirtawpni, June ni 11 ah khan ni khaw hre lovin a awm a. Aizawl atnagin doctor tirh chhoh niin zunthlum leh thisen sang vanga harsatna thleng niin an sawi a. Thisen unit 3 pek hnuah pawh that lam a la pan theih loh avangin Aizawl panpui a ni ta a ni.
A nun hrim hrimah Pu Ziona hian harsatna a lo paltlang hnem khawp mai. Naupang te a nih lai atangin a pate Khuangtuaha leh Chana te hlimna chan leh rawngbawlna avangin endawng leh hmuhsit a tuar nasa em em a, a pate zuitute tih loh chuan an hmusitin an tiduhdah vek tih theih tur a ni a, ani aia hetiang tuar nasa hi an awm lovang e, ti hialin a chanchin hre chiangte chuan an sawi.
School a kal hnuah Kohhran inenhranna leh khawtlang mipui atanga tihduhdahna avangin school pawh a kal rei ta lo. Hei hi pawi a ti a. A kohhran mi leh saten lehkha an zir theih nan a hnuah primary atanga higher secondary school thlenga a din phah chhan pakhat a ni.
A tleirawl chhuah atangin hruaitu ni tura piang a nina a lang hrim hrim tawh a. Thiante zinga hruaitu ena an en chi, thenrual huikhawm thiam chi kha a ni a. A pa Kohhran din Lalpa Kohhran thara thalaite huikhawmtu ber, hnathawhna lam thlenga an hotu a ni. A pa hian a awm loh huna Kohhran enkawl turin a chher hrim hrim bawk a, inrelbawlna leh inkaihhruaina pawh a kutah hian a dah tam tial tial a. Kum 1997 a a pa, Chana boral hnuah khan hruaitu nihna chu a chelh ta nghal chat.
A chanchin inziahnaah chuan a naupan lai atangin Pathian mi ruatbik a ni, tiin an tarlang. An kohhran mite khawi lo kal dawnin khaw awmdan tur leh an tluang dawn em tih an zawt thin a. In tluang dawn e a tih chuan ngaihngam takin an kal a. In tluang dawn lo, harsatna in tawk ang a tiha kal luite chu thli leh ruahin a nuai, tawh sual tawkte an awm thin a. A hrilhlawkna hi an ngai pawimawh hle thin, an ti.
An kohhran intodelhna te, hna an thawh nasat dante kan tarlang tawh a. Hemi atana Ziona philosophy chu eizawnnaah rintlak a, kawng engkimah entawn tlak nih tur a ni, tih hi a ni. Hnathawh kawngah entawn tlakin a taima bawk a. Awl ni a nei meuh lo niin an sawi. An khawtlang hmasawnna atana an thawh kawngah pawh hian, “Khawvela cheng kan ni a, ram neitu kan nih avangin hmasawnna chu keimahni thawh tur a ni a, sorkar puihna beisei lovin kan mamawh leh hmasawnna tur chu tha leh rintlak takin kan thawk mai tur a ni.” a ti thin.
Khawvela cheng kan ni a, ram neitu kan nih avangin hmasawnna chu keimahni thawh tur a ni
Environment humhalh kawngah Chhuanthar stadium chhehvela ngawte hi a hmalakna vang a ni a, thing an phun zat te, thing chi hrang hrang awmzatte a chhiar chhuakin a record thlap peih a. Green Mizoram day-a kan thingphun tawh, a nung leh nung lo zat kan hriat hleitheihte nen chuan kan inhlat leh deuh. Environment humhalh hi an kohhran zirtirnaah pawh a senglut nasa a, football tournament “Thilsiamte hun chan” tih hmangin thalaiteah awareness an nei thin.
A taimakna hian an khawtlang chu intodelhah a siam a, sorkar puihna tel lova awm thei khawp an nih miau avangin chu chuan zalenna a pe.
