Vawikhatah fa 10 a hring lo
World Record a siam tia a chanchin a darh laiin a rai pawh a lo rai reng reng lo tih hmuh chhuah a ni
June ni 7 khan South Africa-a cheng kum 37 mi Gosiame Thamara Sithole chuan vawikhatah fa 10 a hring niin a chhal a. Khawvela a hmasa ber a ni. Mahse Gauteng Pronvice thuneitute chuan an chhui chiang a, he nu hi a rai lo hrim hrim tih an hmu chhuak. Gosiame hi rilru lam chiang lo enkawlnaah dahluh nghal a ni.
Fa 10 a pai tih hi Pretoria News chuan an tichhuak hmasa ber a, June ni 7 khan fa a hring a, damdawi in chuan an enkawl hleitheih loh avangin thup an tum a, a chanchin hi a hnuah puanzar lohvin a awm niin an sawi. Mahse Gauteng Province thuneitute chuan hei hi thudik lo a nih thu leh, Pretoria News lakah hian thubuai an thehluh tur thu an sawi thung.
Fa 10 an pai tih hi Gosiame-i pasal Teboho Tsotetsi-a sawi chhuah a ni a. Fa an neih hnuah hian hrileng kaihhnawih avangin damdawi inah a va hmu thei ta lo niin a chhal a. Fa 10 an nei tih hi an khaw Mayor chuan a nemngheh hnuah chanchin tharah a lang ta chuai chuai a, mahse a hnuah Mayor hian an chhungte tawngka chauh an hriat thu a sawi leh thung.
An naute leh a nu hmuh tur an awm tak lovah hian Gauteng Province thuneitute chuan a chhui hna an thawk a, Gosiame hi chhui chhuah niin endikna hrang hrang an neihtir hnuah a rai lo hrim hrim tih an hmu chhuak ta a ni.
