June 3, 2024:
Vawiin khan Vairengte Kuhva Society-te’n a ruka Assam lam pan pui tur Myanmar kuhva ro an man.
Vairengte Kuhva Society te hian an Kuhva thar leitu tur an hmuh loh chhan chu Myanmar atanga dan lova kuhva ro tawlhruk vang a nih thu sawiin, tun hnai atang khan kuhva ro tawlhru tih tawp tuin beihpui thlakin hmun remchang ah chhun zan zawmin duty an in siam thin a. Vawiin khan an thu dawn bawhzuiin, Vairengte tlak lam Aitlang rama ramri kawng laihah Kuhva ro phur Tata yoda leh pickup motor 7 chu kawng nal leh diak avanga an tang nangchingin an man a, heng kuhva neitu te hi tumah hmuh tur an awm loh avangin tu ta nge tih hriat a ni lova, motor pakhat hian Kuhva bag 20 vel zel phurin society hruaitu te hian a hmunah an tihchhiatsak nghal a ni.
Kuhva phurtu te hian an motor tang buaipui nan JCB an hmanga, an kuhva phurh te pawh motor atangin an lo hlangthla vek bawk. Society hruaitu te sawi danin he kawng atang hian Assam lam panin, ramri ah an in hlanchhawng thin niin an sawi bawk.
Vairengte Kuhva chingtu Co-operative Society chuan thu chhuah siamin Kuhva ro sumdawnna a tawp theihna tura hma an lakna kawngah Kuhva roa sumdawngtute chu ti lui tawh lo turin an hriattir a, Hachhek tlang dung, Zampui tlang dung leh Bilkhawthlir lamah Burma kuhva ro leh a phurhna lirthei-te an hal ngam a nih chuan, Vairengtea kuhva chingtute pawhin an tih ang chu an ti ve thei a ni tih lantir kher ngai lo lo turin sumdawngtute chu an hriattir bawk a ni.
