Hrileng thawh thumna, October thla velah a rawn thleng maithei tia mithiamte sawi tawh karah an lu tihaitu thil an hmuh chhuah belh leh a. Chu chu hri insiam danglam thar, delta plus variant an tih niin India ramah Maharashtra-a Ratnagiri leh Jalgaon-ah te, Kerala leh Madhya Pradesh-ah te hmuh tawh niin, he hri insiam danglam thar hi June ni 22 thleng khan case 22 hmuh chhuah a ni tawh a. Khawvela hri insiam danglam tawhah chuan a chimawm ber pawl a ni ta hial awm e, mithiamten buaipui tham tak a ni dawn, an ti.
Hrileng thawh hnihna rawn thlentu ber Delta variant kha ram 80-ah hmuh chhuah a ni tawh a, tuna a insiam danglam belh leh Delta plus hi US, UK, Portugal, Switzerland, Japan, Poland, Russia leh China bakah India-ah te hmuh chhuah a ni leh tawh a. Tunah darhsarh lo takin awm mah se a rawn darh leh huk chuan hrileng thawh thumna chu a intan leh nghal dawn niin an ngai.
An lu tihaitu ber pakhat chu he delta plus variant hi a damdawi la tawhte pawhin an kai leh thei dawn tih hi a ni a, kan taksaa hripui natna hrik lo do thei tura a dotu insiam tawh, antibody an tih chu hel dan a thiam riau tawh a. A damdawi lakin awmzia a neih loh hun a thleng thuai ang tih an hlau.
India-a a damdawi kan hman pahnih Covishield leh Covaxin te chu tun hrileng thawh hnihnaa a insiam danglam, Mizoramah pawh kan hmuh Delta Variant dona atan a hmantlak tih finfiah a ni tawh a, a tira hri laka invenna tura beisei ang erawh chuan a thawk tawh meuh lo. Delta plus lakah hian eng nge an an dawn tih chu sorkarin puanzar vat a tum nghe nghe.
Hri chungchang zirchiangtu mithiam INSACOG a mite chuan Delta Plus variant hian a invenna damdawi leh taksaa natna do pawl lo awm tawh chu a pumpelh thei tawh maithei niin an sawi. A damdawi kan lak hian he hri do thei tur chu kan taksaah a insiam a. Chubak chuan hri kai, dam lehten invenna chu an taksaah an nei tawh bawk a. Mahse Delta Plus chuan chung invenna, he hri umbo tura khawvela innghahna pakhat chu awmze nei lovah a rawn chantir thei maithei, an ti.
Delta Plus hi tun hrileng thawh hnihna Delta variant zulzui a nih bakah South Africa lama an hmuh chuah Beta variant nihphung thenkhat a nei tel bawk a, chu chu buaipuitham an tih lai tak chu a ni.
“Beta variant khan hri rawn leng hmasa alpha variant aiin a invenna damdawi pumpelh dan a hre zawk a, hemi kawngah hian Delta variant ai pawhin a fing zawk.” tiin mithiamte chuan an sawi. Beta variant hmuh chhuah a nih avang hian South Africa sorkar chuan AstraZeneca te damdawi siam, India rama Covishield an tih chu an thawnkir leh nghe nghe a, a damdawi hi kan tan chuan a thawk ve lo, an ti.
Delta variant hlauhawmna pakhat chu inkaichhawn a awlsam zawkna a ni a. A tira leng ai khan za zela 50 velin inkaichhawn a awl tawh zawk a. Delta Plus variant hi chu ai chuan inkaichhawn a awlsam zawk dawn em tih erawh chu hriat a ni lo thung a, hemi chungchang hre tur chuan finfiahna kan la nei tam tawk lo tiin mithiamte chuan an sawi a. India ramah case 25000 atangin case 22 ah hmuh chhuah a la ni chauh a, ram puma hrileng ngaihtuah chuan delta plus hi kan la hmu chhuak tlem lutuk a. Chuvangin a natna hrik zirchianna tam zawk kan la mamawh a ni, an ti.
An zirchian tawhnaah erawh chuan delta plus hi delta aiin inkaidarh a awlsam lehzual dawn a. Kan chuap timurah an bei nghet zawk thei dawn bawk. Hei bakah hian a invenna damdawi leh antibody paltlang theihna a nei a, hri kai enkawlna atana an hman Donald Trump-a pawh an lo enkawl tawhna monocolonal antibody treatment chu awmze nei lova siam theihna remchang a awm, tiin INSACOG-a an mithiam Prof Shahid Jameel chuan a sawi.
Hri lo do tur hian kan taksain protein a pe chhuak thin a, monocolonal antibody an tih hi chu kan taksaa natna do pawl hnathawh ang thawk thei tura an siam chhuah chu a ni a. A siamdanah pawh taksaa natna do pawl la chhuakin an tipung a, hrikai damlote enkawlna atan an hmang thin.
Covid-19 kaite enkawlna tan hian REGEN Cov2 an tih chu hman a ni a. SARS Cov2 in kan timur a luh a, inthlahpunna atana a hman thin spike protein an tih lai chu hnathawk thei lovin he damdawi hian a siam a. A natna insiam danglam tawh hovah pawh inenkawlna atan chuan a hmantlak zui hle niin US lama zirchianna chuan a tarlang.
He damdawi hi hri kai zawng zawng enkawlna atan chuan a hman theih lem loh a, a natna lang chhuak nasa lutuk lote enkawlna atan a tha ber a. Oxygen mamawh tawh chinte erawh chu he damdawi hmang hian an enkawl ngai lo. An nat dan a zir leh an enkawl hunin kawngro a su hle.
Delta Plus hian he enkawlnah hi awmze nei lova a siam theihna remchang a awm rualin inenkawl hun a dik chuan hneh theihna remchang a nei dawn niin NITI Aayog-a Health lam changtu VK Paul chuan a sawi.
Hri kai, an taksaa a natna do thei tur antibody la insiam lo enkawlna atan a tha ber a. Chung mite chu he damdawi hmanga enkawl an nih chuan zaa 5 velin thihna thleng a pawt tlem thei tih Oxford University zirchianna chuan a tarlang. India-ah pawh he damdawi hmanga inenkawlna hi a rawn lut ve tawh a, a man erawh a to khawp mai dose khat chu cheng sing 6 man vel a ni.
Delta plus leh hrileng thawh thumna hian inkungkaihna a nei dawn em tihah mithiamte chu an chiang ngam lova, a ni thei a, a ni kher lo thei an ti. Tuna hrileng thawh hnihna hi kum 2020 December thla khan case tam vak lo kan hmu chhuak a, mahse April thlaa hrileng thawh hnihna rawn thlentu ber a ni thung a. A inkungkaih theihna tur chu tunah chiang takin lang lo mah se thawh thumna rawn thlentu a ni thei viau dawn a, fimkhur taka kal a tul, an ti.
Hrileng thawh thumna hi na deuh thei a ni a, inkaihhruaina a that a, mipuiin an awm that chuan a na vak lo thei bawk tiin an lo sawi tawh
