Mizorama Tournament kaltluang rei bera an chhal leh Tuipuiral huam chhunga Tournament ngaihhlut hlawh ber Tuipuiral Games 2024 Football chu Nimin khan Sesih khelmualah final khelh a ni a; Nimin final-ah a thlengtu Sesih-in Leisenzo si 1 faiin an hneh a, inkhel hmuhnawm leh boruak tang tak hnuaiah hian goal a lut har hle a, Team pahnihin goal khung theihna hun tha an neihte an hmang tangkai thei lawk lo a, Ist Half-ah goal lut a awm lo.
2nd Half-ah a thlengtu Sesih hian min 72-naah Sawmliana hmangin goal an khung a, he inkhela goal awm chhun leh Sesih Champion-na goal a ni zui ta a ni.
Football Champion – Sesih
Runners up – Leisenzo
Best Player – Langchhuankima, Sesih
Top Scorer – Thangnunsiama, Leisenzo
Best Goal keeper – Thangdeihmuana, Sesih
VOLLEYBALL CHAMPION – KHUANGLENG & DUNGTLANG
Nimina Volleyball Mipa Final inkhel hmuhnawm takah hian Champion tura rinkai pahnih Khuangleng leh Farkawn an inhmachhawn a, Team pahnihin Set 2 ve ve an lak hnuah Deciding set Khuanglengin la-in 3-2 a hnehna changin an Champion ta a ni.
Volleyball Champion – Khuangleng
Runners up – Farkawn
Best Spiker – Larinkima, Khuangleng
Best setter – Malsawmdawngliana, Khuangleng
Hmeichhe Final-ah Dungtlang leh Khuangleng inhmachhawnin Player nei tha zawk Dungtlang an chungnung tluan a, Khuangleng hian kawmg engkimah an pha lo a ni ber. Dungtlang hian set hloh nei loin 25-12,25-13,25-19 a hnehna changin a vawikhatna atan an Champion ta a ni.
Volleyball Champion – Dungtlang
Runners up – Khuangleng
Best Spiker – Hualhlunchhungi, Dungtlang
Best setter – Vanlalmawii, Khuangleng
