Synod inkhawmpui vawi 100-na Mission Veng Kohhran Biak Ina neih mek chu nimin leh vawiinah rorel chhunzawm a ni.
Vawiin khan rorel chhunzawm a ni a, Grape tui Sakramen-a hman chungchang sawi ho niin tuna hman lai chu la hman rih nise an ti a, SHSS Boys Hostel Building sak that leh ‘Synod Office zauh leh siam rem chu rem tih a ni a, Council of Churches in Mizoram kalphung leh ruangâm pawm a ni bawk.
‘Nupa chungchang dan en that, Synod hnuaia thawktu transfer & posting chungchang, Synod Pay Commission hma lakna en that, ‘PRESCOM Department en that te pawm a ni a, Pathian Biak Inkhâwm kalhmang zir chiana siam that ngai lai a awm chuan siam that nise an ti a, Kum 2024 – 2025 budget estimate Rs. 4,97,58,62,000 chu pawm a ni bawk.
Nimina rorel inkhawmah Agenda 19 rel hman a ni a, ‘Inkhawm tihtlêm chungchanga zir chianna leh Presbytery ngaihdan khaikhawmna’ ngaihthlak a ni a, zir chiangtute rawtna siam leh Presbytery ngaihdan angin kal dan ngaia kal an rel a, Kum 2024 leh 2025-a thawktu pension turte chu siam that ngai siam that niin pawm a ni a, Special Ordination chungchang SEC-in a zir chianna pawh pawm a ni bawk.
Lehkhabu tha chhiara hma sâwn theih nan hma lak’ rawtna te, Inneih kaihhruaina inzirtir thar’ rawtna te SEC bawhzui tura dah a ni a, Contract hna hralh chungchang’ Champhai North Presbytery atanga lo lut chu Kohhran duh loh zawng a ni a, SEC-in hma lo la rawh se, an ti bawk.
Chhungkaw harsate khai chhuak zâwnga tun aia nasaa hma lak’ rawtna te, Pêm Upa thlan nawnte Certificate pek’ rawtna ‘Fa lâk (adoption) chungchanga zirtirna siam’ rawtna te chu SEC bawhzui tura pawm a ni a, Synod Board leh Committee-a Presbytery aiawh thu zui awm thin tihtâwp’ rawtna committee term thar (2025 – 2026) atanga hman tan nghal tura tih a ni.
Inkhawmpui rorel tawh leh Kohhran Practice mek tihdanglam thuah fimkhur taka kal’ rawtna chu fimkhur taka kal zel ni rawh se an ti a, Synod pêm hruaina dan 2017 en that’ rawtna chuchu tha tih a ni a, SEC-in hman nghal turin lo ruahman rawh se, an ti bawk.
Heng bakah hian Chhungkaw kehchhia an pun zel loh nan hma lak’ rawtna te, Mizo Kristian Lêngkhâwm Hlate audio-a dah thatna siam’ rawtna te, Zirlaite hnena Scholarship, Stipend leh Pocket money pêk dân en that’ rawtna te, SEC kutah dah a ni.
