Tau thla ni 8, 2024 :Sub Hqrs YMA Champhai rorel inkhawm vawiina neih chuan Indo Myanmar border hung a nih lohna tura hmalak an rel.
Vawiin khan Sub Hqrs YMA Champhai chuan Hmunhmeltha YMA Hall-ah Rorel inkhawm an nei a, rorel inkhawm hi Pu R Lalrinmuana SYMA Champhai president chuan a kaihruai a, Sorkar khawih agenda 3 chhawp chhuahte pawm vek niin Indo Myanmar border hung a nih lohna turin SYMA Champhaiin hma la rawh se tih chu pawm niin Champhai Khankawn atanga Kanan Veng inkar kawngpui laih zauh a nih theihna tura hmalak leh SYMA Champhai huam chhung atanga Scuba diving zing tur mi 5 tirh ni rawh se tih te chu pawm a ni a.
YMA Khawih agenda chhawp chhuahte pawm vek a ni bawk a, SYMA huam chhungah ruihhlo a bikin Heroin leh Methaphetamine do kawngah tun aia nasa zawka hmalak te, lui dung nungcha leh Lung humhalh kawng a hmalak te, SYMA Champhai huam chhunga tleirawlte zo nun ze mawi uar zawka zirtir te, SYMA huam chhunga Goup YMA-in thisen an pek ve theihna turain an thisen pek thla siam sak te leh Mizoram chhunga kutdawh pung tual tual chu Central YMA-in zir chiang rawh se tihte chu an pawm a; Kum 2024-2025 budget atan Cheng 26,65,000 chu an pawm bawk a ni. Rorel inkhawmah hian YMA member thi mi 227-te sun an ni.
Sub Hqrs YMA Champhai rorel inkhawm hi hun hnihah then niin hun khatna hi Pu T Lalnunsanga Vice president-in a kaihruai a, Pu C Lalbiakzaua, SYMA Champhai president lo ni tawh chuan thu sawiin YMA member-te chu YMA thuthlunga chian a ngai a, thuthlunga chiang lo tan ram leh hnam a hmangaih tak tak theih loh niin a sawi a. Ram leilung humhalh a tul thu leh YMA member ruihhlo avanga thi an tam lutuk avanga ruihhlo nasa leh zual do a tul tute a sawi a. Pu C Lalbiakzauva chuan ram bil leh khaw bil rilru putna chu paihboa tul thu sawiin zirtirtu emaw doctor emaw sawn chhuah indan awm thin chu thil tha ber a nih loh thu a sawi a, midang pawhin an mamawh ve vek a nih avangin Mizote’n sem sem dam dam ei bil thi thi an lo tih thin chu vawn nun that leh a tul thu a sawi bawk.
