‘Ram Rawngbawlna chu Pathian rawngbawlna ropui tak a ni tih hre chungin Sorkarin hma a la dawn’ Lalduhoma, CM

Chief Minister  Lalduhoma chuan Sorkarin ram rawngbawlna chu Pathian rawngbawlna ropui tak a ni tih hre chungin hma an la dawn niin a sawi.

Vawiin khan Chief Minister  Lalduhoma chuan Kulikawn Hospital building thar leh a kaihhnawih building thar sakna tur hmun a tlawh a;  Lalrinpuii, Health Minister leh Lalchhuanthanga, bialtu MLA ten an tawiawm a; Deputy Medical Superintendent Room a inkawmna buatsaihah thusawiin Chief Minister chuan, Kulikawn Hospital complex thar sak a nih theih nana bialtu MLA thahnemngaihna chu fakawm a tih thu sawiin Health Minister pawhin a pawimawhzia hriain theihtawp a chhuahna avangin bul tan theih a ni dawn ta niin a sawi a; Hun reilote chauh sawrkarna an la kalpui chhunga Health Minister hmalaknate chu a chhuanawm a tih thu a sawi bawk.

Chief Minister chuan Aizawl Civil Hospital-in mipui dawl zoh tawh lo thu sawiin ZMC chu mi nawlpui tan a hlat avangin Kulikawn Hospital-ah sawrkarin khum 100 awm theihna Hospital thar sak an tum niin a sawi a; Hna te tha taka thawh a niha, a hun tak zawh a nih theih nan thawktu chu theihtawp chhuah turin chah a ni. Chief Minister chuan, sawrkar tharah mipuiten beiseina thar an nei lian a, damna a thleng mek a, sawrkar hnathawkte pawh an phur a, hna tha thawk turin an inpeih at vek ni-a sawiin Chu chu hriain sawrkar pawhin theihtawp a chhuah dawn a, ram rawngbawlna hi Pathian rawngbawlna ropui tak a ni tih hre chungin hma an la dawn niin a sawi bawk.

Health Minister  Lalrinpuii pawhin thusawiin, thingtlang lama chengten inentir tura Aizawl an pan nasat avangi Aizawl Civil Hospital leh ZMC te a lun em em mai a. Hemi tiziawm tur leh lam hnai zawka inentirna tha an hmuh theih nan District Hospital te an thuam tha chho mek a. Thawktute pawh a tul angin an in siamrem dawn tih a sawi bawk.

Kulikawn Hospital Complex thar hi Ministey of DoNER scheme NESIDS sum cheng Vaibelchhe Rs 67.63 Crore hmanga thawh tur a ruahman a ni.