November thla chhunga Champhai Police Station-a thubuai ziah luh zingah rukruk thubuai a tam ber a, thubuai ziah luh zingah pawngsual thubuai 1 a tel.
J Ginzamanga kum 53 mi chuan pianphunga rualban lo hmeichhia kum 39 mi chu a pawngsual thin ni-a sawiin a unaupa-in Champhai Police station-ah thubuai a theh lut a, FIR-a tarlan a nih danin hmeichhia hi a chhungte awm loh hlanin J Ginzamanga hian tum 6 a pawngsual a ni. Pawngsualtua puh hi Champhai Police-te chuan manin Pawngsual thubuai siamsak a ni a, Lung inah khung mek a ni.
Thla liam ta November thla chhung khan Champhai Police Station-ah thubuai 25 ziah luh a ni a, rukruk thubuai ziah luh tam ber niin 10 ziah luh a ni. ND&PS Act hnuaia thubuai ziah luhin dawtin 6 ziah luh a ni a, November thla chhung hian Heroin Kg 1 leh Gram 199 a rit an man a, hei hi tualchhunga hralhnaa chhutin cheng 35,97,000 hu a ni. MLP Act hnuaiah thu buai 5 ziah luh a ni bawk a, Beer Case 120, Myanmar zu BEDC Litre 161 an man a, hei hi tualchhung hralhnaa chhutin Cheng 1,80,750 hu a ni.
November thla chhung khan Champhai Police Station-ah hian Lirthei chesual, inbumna leh mi kutthlak thubuai 1 theuh ziah luh a ni bawk.
