India leh Myanmar inkal pawhna khar tumna chu Zokhawthar khawtlangin an thlawp loh thu sawi.
May ni 1 atanga thu leh awm hma Assam Rifles te’n India leh Myanmar in kalpawhna Zokhawthar Tiau Lei khar an tumna chu Zokhawthar khawtlang chuan an thlawp loh thu sawiin ramri khar hian an eizawnna neih chhun a tihchhiat vek theih thu an sawi a.
Maipawl zawhna chhangin Zokhawthar YMA President Pu Ramtharnghaka chuan India leh Myanmar insumdawn tawnnaah hian Zokhawthara cheng tam berte eizawnna a inghat a, Sumdawng piah lamah bungraw lut leh chhuak thiara inhlawh chu an innghahna ber a nih thu sawiin lonei turin Zokhawtharin ram an neih loh avangin ramri khar tumna hian an eizawnna a nghawng nasat dawn avangin ramri khar tumna chu an thlawp lo a, bialtu MLA hnenah hmalakpui tura ngenna an thlen tawh thu a sawi.
Zokhawthar leh Myanmar lam Khawmawi te chu khaw khat ang maia cheng za, an mamawh leh chakkhai pawh inban tawn a, chhiat ni that ni-a inlenpawh tawn thin an nih avangin inkalpawh thei lo tura ramri khar chuan nitin khawsak phungah nghawng nasa tak a neih thu a sawi a; Zokhawthar hi tun dinhmunah Mizorama raltlan tamna berte zinga mi a ni mek bawk a. A buaipuitute chhinchhiah danin mi 7000 vel an cheng a. Raltlante tanpuina a luh mumal tawh loh avangin raltlante hi nitina inhlawhfa leh dawrkaiin an eichawp an dap a. Ramri khar hian raltlante thlenga a nghawng theih tur thu Zokhawthar YMA President chuan a sawi bawk.
Puan tawh angin MP inthlan avanga ramri khar a nih hnuah vote thlak zawh tuk April ni 20 khan hawn leh ni mah se, inthlan hma angin zalen takin a inkal pawh theih tawh lo a; April ni 30 thlengin Rilruk thil, dam lohna leh zirlai te bak chu inkal pawh theih a ni tawh dawn lo a, inkal pawhna Lei bakah hian in kalpawhna dang pawh Assam Rifles-in uluk takin an veng zui a. May ni 1 atangin ramri-a inkal pawhna hi khar a ni tawh dawn a ni.
