MNF chuan Pathian leh Mipuite duhdan angin Sawrkar thar ZPM kaihhruai alo piang ta a, Sawrkar hmasain theih tawp alo chhuahpui tawh angin raltlante tan theih tawp chhuah chhunzawm turin, MNF chuan ZPM Sawrkar chu an ngenin, an chah tih an sawi a.
MNF chuan an duh reng vang ni hauh lovin, Myanmar, Bangladesh leh Manipura cheng zofate chuan harsatna namen lo tawkin, an chenna hmunah tihduhdah, nghaisak leh thah an tawk a. An nunna humhim turin Zofate Jerusalem Mizoram an rawn pan a ni tih sawiin Myanmar leh Bangladesh atanga rawn tlanlutte phei chu thawn let turin India sawrkarin na takin Mizoram Sawrkar rawn nawr mah se, ‘dam leh tlang khatah, thih leh ruam khatah’ tiin MNF kaihhruai sawrkar khan a lo hum tih an sawi a. Mipuite nen tangkawpin ei leh in, chenna leh thuamhnaw bakah zirna thlengin a pe a, An tan huaisen takin a ding tlang niin an sawi a.
MNF chuan Mizo hnamin a mawhphurhna tlansan lova, a dingnghet tlat angin, an chenna hmun ralmuang a nih a, zalen taka nun an hman leh theih hma chu thlamuang taka Mizorama an awmzui zelna turin Mizoram Sawrkar, ZPM kaihhruai chu ding chhunzawm zel tur leh nghei lova, an mamawh angte pe chhunzawm zel turin an chah a. Zohnam inpumkhatna kawnga huaisen taka Pa chan changa a din chhunzawm zel an beisei tih an sawi bawk.
