Mizo zirlai Pawl (MZP) chuan National Institute of Technology (NIT Mizoram)-ah sum leh pai hman danah leh thawktu lak danahte hian thil fello tam tak inphum ru a awm niin an sawi.
Vawiin khan MZP hruaitute chuan Aizawl Press Club-a thuthar thehdarhtute kawmin NIT chungchang hi an sawi a, Mizoram-in Technical Institute lian a neih chu Mizoram tana chhenfakawm tura beiseina sang tak an neih mek laiin an beisei leh duh angin a awm lo hle tih tunhnaiah hmuhchhuah ni-a sawiin Institution in-awp danah te, sum leh pai hman danah te leh thawktu lak danahte hian thil fello tam tak inphum ru a awmin MZP chuan an hria a, pawi an tih thu an sawi.
MZP chuan Natioan Institute of Technology (NIT Mizoram)-a hna lak thenkhat chu a dik tawklo hlein ni-a an hriat thu sawiin induhsakna uchuak leh tih tlin tum neisa rana lak a awm tih hriat a ni, Advertisment chhuah rual vek ni si, post thenkhat chauh lak bik te, Board of Governor-in appointment approve an pek hma a appointment order rang taka tih chhuah te, hna exam thenkhat observer tello a exam te a awm a, advertisement chhuah tawh tam tak tun thenga lak si lohte chu MZP chuan mak a ti a, a mawhphurtu chhuizui zel an tum thu an sawi bawk.
MZP chuan hna lak felfai loh avanga candidate thenkhatte’n High Court hial an thleng a, hei hian insitution a hnalak fello loh zia a tarlang chiang hle tih sawiin he instituion-ah hian sum hmandan felfai tawklo tam tak a awma an hriat thu lehCBI pawhin an chhui ngai hial khawpa sum hman dan hi a fello hle a, mimal induhsakna uchuak tak hmanga sum siam tum an awm em tih hi MZP zawhna a ni a. Enzui zel an tum thu an sawi bawk.
MZP chuan He Institution-ah hian thawktu thekhat ten, an hnuaia thawkte an duh ang anga an tih theih loh avangin an vau thin nia sawi a awm te, Ban hiala invauna te chu a thalo an tih thu sawiin hei hian an administration hlawhchham zia a tarlang chiang hleah an ngai tih an sawi bawk.
MZP chuan Non Teaching-te kaisan theih nan, Ministry-ah post sanction tura hmalakna lian tham a awm ngailo ni-a an hriat thu leh zirtirtu erawh an eligible lo chunga grade pay zuan khuma promotion pek a awm ni-a an hriat thu sawiin zirlaite tana Bus hire sak, bill pek theihloh avanga hun rei tak tak zirlaite kalvelna (Bus) tlan theilo te chu zirnain a tuar hle niin an sawi a, MZP chuan hetiang thil fello a awm tih an hriat avangin, uluk takin an zirchiang a. Institution chungchanga hriat duh a neihte RTI hmangin a zawt am RTI Act hmanga zawhna MZP-in a zawhte an chhan danah hian an lawmlo hle tih an sawi bawk.
