Champhai District Child Protection Officer hnen atanga Maipawl thu dawn danin nimin khan Lalrampari, Champhai Venglai chuan a nau awm mipa naupang kum 4 mi chu nataka a sawisak thu an dawng a, Child Welfare Committee-in Champhai Police Station-ah FIR thehlutin naupang na taka sawisatu hi Champhai Police te chuan manin The Juvenile Justice Act leh BNS (2) hmanga thu buai siamsak a ni a, vawiin khan Champhai District Court-ah hruai niin Lung inah dah luh a ni.
He thil hi nimina thleng niin naupang nu hi Chawngthu Hotel-ah a inhlawh thin a, a inhlawh hlan hian a unaupa (a cousin) nupui hnenah a fapa hi awm turin a dah thin a, Naupang sawisatu Lalrampari’n Police-te hnena a sawi danin – Naupang nu hian a chhun thil eina tur a fapa hi a ken tir thin a, nimin hian pawisa a ken tir leh tir loh a zawt a, pawisa a ken tir loh thu naupang hian sawiin a nu a um zui a, a rawn kir leh mai tak loh avangin Lalrampari hian a zawng zui a, a hmuh hnu hian a sawisa zui ta a ni.
Naupang a sawisak hi nikhaw hre loa a awm avangin DM Hospital-ah a hruai a, Naupang hi a ban veilam ruh a tliak a, a lu ruh a khik bakah a lu-ah thi a tling bawk a, a taksa hmun hrang hrangah kut thlakna hnu hma tak tam a awm bawk a ni. He thil thleng chungchang hi DM Hospitala thawktute chuan District Child Protection Unit hrilhin Child Welfare Committee-in hma an la zui ta a ni.
The Juvenile Justice Act 75-in a tarlan danin naupang rilru leh taksaa harsatna tawk khawpa insawisaknaa pawikhawihtu hi Kum 10 thleng lung in tang tur leh cheng Nuai 5 thlenga chawi tura hrem theih a ni.
He thil thleng chungchangah hian a tuartu naupang kum tling lo thlalak hi Social Media-ah vawrh darh a ni a, naupang kum tling lo thlalak vawrhdah hi dan bawhchhiatna a nih avangin thlalak vawrh darhtu hi District Child Protection Unit chuan an chhui zui mek bawk a ni. Dan bawh chhia chu thla 6 lung in tang tur leh cheng nuai 2 thleng chawi tura hrem theih a ni.
