Delhi-a cham mek Mizo Zirlai Pawl (MZP) General Headquarters President Pu H Lalthianghlima chuan vawiin November 27, 2023 khan Union Minister of State for Minority Affairs Pu John Barla chu a chenna inah hmuin Mizo zirlaite tana thil pawimawh hrang hrang a thlen.
MZP President hi Rajya Sabha MP Pu K. Vanlalvena’n a kalpui a ni.
MZP President chuan MoS Minority Affairs hnenah hian, Mizo Zirlai tam tak khawsak harsatna avanga zirna sang zawk chhunzawm thei lo an tam thu a thlen a, Zirlaite Hostel tam zawk Mizorami-in a mamawh thu a thlen a ni.
MZP President chuan, PMJVK Scheme kaltlanga nasa zawka zirlaite harsatna sukiang tura pui turin a ngen a, hemi kawngah hian MZP pawhin theihtawp chhuah a zirlaite tan hma an lak thin thu leh theihtawp chhuahpui chhunzawm zel turin a ngen a, Mizo zirlaite thiamna leh theihna haichhuah a nih zel theihna tur leh zirnaa hma an sawn theih nan an harsatnate sukiang tura hmala turin Union Minister of State hi a ngen a ni.
Rajya Sabha MP Pu K Vanlalvena pawhin, zirlaiten hostel an mamawh nasat thu leh MZP hian zirlaite harsatna hrang hrang a buaipui thin thu a thlen a ni.
