Myanmar Sipai tlan bo, mi nupa thah tumtu chu Court-in thiam loh a chantir a, kum 10 chhung Lung in tang turin a hrem
Tualthah tuma puh Myanmar Sipai, Silai nena tlanbo Min Aung, chu Addl District & Sessions Judge-in thiam loh a chantir a, kum 10 chhung Lung in tang tur leh cheng Sang 3 chawi turin a hrem.
Court-in thiam loh a chantir Min Aung hi kum 2022 khan Myanmar Sipai atangin Silai nen a rawn tlan bo a, Champhai Zote-a raltlante dahkhawmna hmunah a awm a, he ta a awmnaah hian kum 2022 September thla khan raltlan zing a mi ve tho Lalmuanpuia-te nupa chu an awmna pindanah luhchilhin zu lei turin a tir a, raltlan camp-ah hian zu leh ruihtheihthil lakluh phal loh a nih avangin Lalmuanpuia nupui Malsawmsangi chuan an kal theih loh tur thuin a chhang a, Min Aung-a thinrim chuan a chempui phawrhin Malsawmsangi hi a nghawngah leh a malpuiah a sat a, a nupui chhan tumtu Lalmuanpuia chu a khup dinglamah a sat zui bawk. Min Aung hi a tlanbo zui a, Hmunhmeltha phaiah hmuh niin YMA hruaitute’n thlam pakhatah manin Champhai Police kutah an hlan a ni.
He thil thleng chungchangah hian SYMA Champhai Raltlan Committee chuan FIR an thehluh bakah hliam tuarte enkawlna kawnga theihtawpin hma an la zui a ni.
Court chuan thu hretu hrang hrangte sawi leh thiltisuatua puh-te a exam-na atangin Min Aung hi thiam loh a chantir a, Addl District & Sessions Judge Pi Sylvie Zomuanpuii Ralte chuan Min Aung hi tualthah tum thubuaiah Kum 7 chhung lung in tang tur leh cheng 2000 chawi turin a hrem a, nataka mi a hliam avangin kum 3 chhung lung in tang tur leh cheng 1000 chawi turin a hrem bawk a, a hremna hi kal kawp tir loin kum 10 chhung lung in a tang ang a, cheng 3000 a chawi dawn a, a pawisa chawi tur hi a pe tla thei lo a nih chuan thla 3 dang a tan belh leh dawn a ni.
