Tun hnaia Myanmar leh India inkalpawhna khar chu tukkin khan Zokhawthara inkalpawhna Gate hawn leh a ni a, May ni 1-a ramri khar tumna chu sut leh rih a ni.
Puan tawh angin MP inthlan vuakvetah venhimna lam avangin Myanmar leh India inkalpawhna Lei Zokhawthar a mi chu khar a ni a, inthlan zawha inkalpawhna hawn leh a nih hnu hian a hma anga zalenin a inkalpawh theih tawh lo a, zirlai leh dam lohna thilah bak inkalpawh phal a ni lo zui a. Ministry of Home Affairs atanga thu an hmuh angin Assam Rifles hotute chuan ramri hnaih khaw thenkhat khawtlang hruaitute ko khawmin ramri hi khar chhunzawm a nih tur thu leh April thla chhungin darkar 72 aia rei in kalpawh a theih tawh loh tur thu te, May ni 1 atang chuan Champhai district chhunga Border Haat-te khar tur a nih thu an hrilh a.
Ramri khar tuma ruahmanna a awm mek lai hian tukkin khan Ramria inkalpawhna Lei Zokhawthar a mi chu hawn a ni a, Maipawl thu dawnnain a sawi danin Ramria inkalpawhna khar hi Ministry of Home Affairs atanga thu hmuh anga hawn leh a ni a, May ni 1-a inkalpawhna khar tumna awm pawh tun dinhmun atan chuan sut leh rih a ni.
Assam Rifles hotute chuan Maipawl zawhna chhangin ramri khar a nihna chhan hi ramri kaltlanga ruihhlo tawlh a hluar vang leh chhinchhiahna awm loa raltlan lut an tam vang niin an sawi a, hun eng emaw ti chhung ramri khar lailawk ni mah se, tunah chuan boruak a pangngai leh tawh niin an sawi bawk.
Ramri khar tumna hian Champhai District chhunga ramri hnaih khuate a ti mangang hle a, Zokhawthar khawtlang chuan ramri khar chuan an eizawnna a tihtawp vek dawn avangin an thlawp loh thu an lo sawi tawh a, hei bakah hian Champhai District chhunga ramri hnaih khaw tam tak chu Tiau Lui behchhana eizawng an ni a, ramri khar tumna leh ramri hung tumna hian a ti ralkhel hle a ni.
Sub Hqrs YMA pawhin India leh Myanmar inrina chu hung a nih lohna tura hmalak an lo rel tawh a, a bawhzui dan tur hi May ni 4-ah SEC in a ngaihtuah dawn a, MZP pawhin ramri khar chu tha an tih loh thu Assam Rifles hotute an lo sawipui tawh bawk a ni.
