Tun hnaia Chin State inkahna thleng avangin Raltlan Mizorama rawn lut an pung nasa hle a; Chin State Chief Minster Salai Lian Luai pawh Mizoramah a rawn tlan chhia.
Thudawn danin tun hnaiah Myanmar khawpui thenkhatah buaina chhuakin ziawm lam pan mah se, a tir lama buaina chhuah vak lohna hmun Zohnahthlak awm tamna Chin State lama tun hnaiah inkahna a thleng fo a, Chin National Front (CNF) leh Chinland Defence Force (CDF) leh Myanmar sipaite inkahna avang hian sahimna zawnga Mizoram rawn tlan chhia an pung nasa hle a, mipui bakah Chin State Chief Minister Salai Lian Luai pawh nimin piah khan Mizoramah rawn tlan chhiain a awm mek a; Chin State CM bakah hian MLA leh MP engngemaw zat Mizoramah an awm mek bawk a; Chin National Army te pawhin inkahna thleng mai thei dinhmuna an din mek avangin an nupui fanaute Mizorama rawn luh tir an tum mek niin kan thudawnna chuan a sawi bawk.
Tuipuiral lamah ral tlan lut leh luh tum an pung nasa hle a, Pu K Lalmuankima Farkawn Joint YMA President chuan Sawrkarin hripui avangin ral tlante Mizoramah luh phal lo mah se, sahimna zawnga rawn tlanchhe zinga nu nau leh raipuar te chu loh theih lovin an la lut tih a sawi a, tun hnaiah Farkawn khuaah mi 175 te luh belh lehin School building pahnihah dahkhawm mek an ni.
Farkawn Joint YMA President chuan kan palai zawhna chhangin Sahimna zawnga rawn tlanchhia Mizoram rawn lut tawh mi 380 te Farkawn Tiau-ah an tangkhang mek a, an tawmhulna tur Silpauline pek niin an inkulh a; heng mite la lut tur hian hmunhma an nei tawh lo tih a sawi a, Tuipuiral Group YMA in Relief Camp siam rawt mah se, Camp siamna tur hmanrua an la neih loh avangin an siam thei lo tih a sawi bawk. Raltlan te hi Tlanglo, Tlangpui, Far-Rawn leh Tah-tlang atanga rawn tlan chhiate an ni a, tun hnaia rawn luh belhte bakah ral tlan awm sa mi 412 Farkawnah hian an awm mek a ni.
Chawngtui East YMA President, Pu Zoramchhuana’n kan palai a hrilh danin tun hnaiah Chawngtui East khuaah ral tlan mi 148 an luh belh a, Tuipuiral Group YMA in Silpauline Bundle 2 leh Cheng Sing 1 an pek hmangin ral tlan te dahkhawmna tur Relief Camp siamin nimin leh Vawiin khan khawtlang mipui an hnatlang a; Relief Camp-a dah te hi ni 10 hnuah hri an kai leh kai loh enfiah an ni ang.
Vaphaiah pawh tun hnaiah raltlan mi 82 an luh belh leh a, Pu Lalhunmawia Vaphai YMA Secy sawi danin Nu nau leh tarchak lo te chiah lak luh rih an ni a, tun hnaia rawn luh belh mi 82 te chu Thlangtlakmual-ah dahkhawm rih niin ral tlan awmsa te nen Vaphai khuaah hian mi 195 ral tlan an awm mek bawk a ni. Vaphaia luh tum kawng laka tangkhang mekte erawh chu Myanmar Sipai te hi inkahna hmun atanga an haw let leh avangin an mahni khuaah an let leh niin Vaphai YMA hruaitute chuan kan palai an hrilh bawk.
