MJA member ni mah ila, chanchinbumite hian min dim bik suh u’ – Tetea Hmar, Excise Minister

Champhaia cham mek Home Minister Pu K Sapdanga leh Excise Minister Pu Lalnghinglova Hmar -te chu tukkin khan Champhai Circuit House-ah Champhai District MJA te’n lawmpuina thilpek an hlan a.

Excise Minister Pu Lalnghinglova Hmar chuan MJA member an nih avang ringawt a, an thil tih that tawk loh awmte thup bo sak lova, dim bik lo tur leh puan hnuai thil nena infak lo turin chanchinbumite a sawm a ni.

Pu Lalnghinglova Hmar chuan ram tichhe thei ruihhlo leh dan phal loh thilte chu sorkarin tih tawp a duh a, ral thlir mai lova thil awm dan a hmuna zirchiang tura Champhai kal an nih thu a sawi a, dan leh thupek kengkawhtute’n harsatna an tawh hrang hrangte uluk taka zirchian a ngaih thu a sawiin Champhai chu ramri-a awm a nih avangin ramria insumdawn tawnna a ni a, thil tha lo tam tak lut mah se, thil tha leh tangkai tak sumdawnna lam pawh ngaih pawimawh a tul thu a sawi bawk.

Home Minister Pu K Sapdanga pawhin thu sawiin Champhai hmasawnna turin Champhai Development Committee a din thuai beisei a nih thu a sawi a, ram tana theih tawp chhuahpuiah chanchinbumite a sawm a; Pu K Sapdanga chuan Vanglaini chanchinbu an chhuahsan dawnah an mahni dim bik lo turin an thawhpuite an chhuahsan tih a sawi bawk

He inkawmhonaah hian Champhai South bialtu MLA Lt. Col Lalhmingthanga pawh telin Home Minister leh Excise Minister-in official tour an neih hmasak berna tura Champhai an thlang chu lawmawm a tih thu sawiin chanchinbumite chu an tawn hriat hmanga thurawn pe thin turin a sawm bawk.

MJA Vice President Pu Lalhlupuia chuan chanchinbumi atanga Minister hiala inhlangkai thei an member pahnihte chu an chhuang tak zet tih a sawi.