Maipawl in thu a dawn danin Myanmar atanga Mizorama raltlan rawn lutte chhawmdawlna turin sum chu Mizoram sorkarin a nei lova. Sum leh paia puihna awm theih dan tur kawng a dap. Myanmar ram buainaah India chuan ngawih a chuhin raltlante luh a phal lova, sorkar laipui atang chuan puihna dawn a remchan hmel loh niin thudawnna chuan a sawi.
Mizoram leh Myanmar ramri depah buaina a chhuak tharin sipaiin an mi leh sate an tirh luh belh a. Hei vang hian tun hnaiah raltlan an pung thar hle.
Chin state, Myanmar-a buaina chhuak avangin Mizoram a bikin Champhai District-ah raltlan mi 300 chuan an luhbelh a. Farkawn chuan raltlan 128 an mikhual mek a, Vaphaiin mi 96 leh Chawngtuiin mi 75 an lo dawngsawng tawh. Hrileng avanga inkharkhipna avangin ramriah tangkhang mi engemaw zat an la awm niin Tuipuiral Group YMA hruaitute hnen atanga thudawn a ni.
Myanmar atanga raltlan rawn lut atangin mi 3200 vel chu Champhai District atangin Myanmar-ah an kir leh tawh niin Champhai DC Pi Maria CT Zuali chuan a sawi a. Chhinchhiah danin tun dinhmunah raltlan hi Mizoramah mi 10000 chuang an la awm.
February thla tir atanga raltlan lo lutte hi mimal leh tlawmngai pawlte chuan lo dawngsawngin an ei leh in, an chenna tur an ngaihtuahsak a. Ram dang atanga tanpuina dawn leh vehbur khawnte, mimal thilpek hmanga tanpui thin an ni a. Hrileng avanga thla khat chuang inkharkhipna vang leh hnathawh theih loh avangin mi engemaw zat chu an ram lamah an kir leh a ni.
