Vawiin khan Mizorama COVID-19 inkhuahkhirhna kalpui mek chu Health Minister Dr. R. Lalthangliana hovin thlirho a ni
He hunah hian June ni 30 thlenga hman tur SOP kalpui lai mek sawiho a ni a, ngaihdan leh rawtnate sawiho niin State Executive Committee on State Disaster Management Authority in July ni 1, 2021 atanga hman tur SOP buatsaih se an ti.
Medical operational Team leh ICT department in contact tracing software an buatsaih chu a tha tawka hriain hman thuai tura tih a ni a, hei hian contact tracing khawihtu police te leh LTF te nasa taka a chhawk zangkhai beisei a ni. Meetingah hian dawr hawn chungchang kalpui zel dan turte, Containment zone puanna hmuna hmalak chhunzawm zel dan turte leh sample endikna uar zawka kalpui dan turte an sawiho bawk.
Meeting-a report khaikhawmna:
- June ni 24 thlengin Vaccine dose 513641 pekchhuah tawh a ni a. Full dose la tawh mi 53960 an awm.
- Kum 45 chunglamte first dose pekchhuah tawh zat chu india ram pumah 43% a nih laiin Mizoramah chuan 76% a ni.
- Kum 18 – 44 inkarte vaccine pekchhuah tawh zat hi India ramah 11% a nih laiin Mizoramah chuan 41% a ni.
- Vaccine second dose la turte tan stock a awm tha
- Zoram Medical College-ah COVID-19 positive mi 1342 admit tawh. Chawhrualin damlo 1 hi ni 11 chhung enkawl ang an ni
- Enkawl rei ber chu ni 63 chhung admit a ni.
- Damlo admit zinga 83.5% hi kum 18 – 59 inkar an ni a, CT scan tih sak mi 535 zinga 30% chu COVID pneumonia vei an ni.
- Damlo admit zinga 18% hi ICU a dahluh ngai an ni a, admit ruala ICU a dahluh nghal ngai hi 12% an ni.
- Admit hnua ICU a dah ngaite hi admit an nih atanga ni 6 ral hmaa dahluh deuh vek an ni.
- ICU a dahluh zinga 77% hian natna benvawn an nei a ni.
- Naupang 66 admit an ni tawh a, a tam ber chu kum 1 leh a hnuai lam niin, chawhrualin ni 10 chhung vel enkawl an ni.
