Pathianni zinga an chenna ina thi-a an hmuh Manlianchingi (37), Mimbung a cheng thihnaah tukin khan Ngopa Police Station-ah tualthah thubuai ziahluh a ni a. Pawikhawihtua puh leh nunna chan ta pasal Chinpauva chu Jail-ah dahluh a ni.
Manlianchingi hi Pathianni zing khan a pasal chuan a muhlum niin a sawi a. Vui tura an inbuatsaih laiin Lamka-a a chhungte chuan a ruang hi lo la dah a, an rawn thlen hma chuan lo vui rih lo turin an ti a. Hei vang hian Manlianchingi hi darkar 24 chuang zet vui lohvin a awm.
Pathianni zinga thi-a an hmuh Mimbung-a cheng Pi Manlianchingi, kum 37 thihnaah thu chiang a la awm thei lova, a pasal Pu Chinpauva erawh rinhlelh thilah police ten an la tawh a. Pi Manlianchingi ruang hi vawiin khan endik a nih hnuah vuiliam a ni a, darkar 24 chuang zet vui lohvin a awm thung a. A chhuina la kal tur ni mah se kan hriat theih ang ang tawitein kan tarlan dawn a ni.
Mimbung atanga thudawn danin Pi Manlianchingi thih hun tak hi hriat a ni lova, Inrinni zan vel ni tura ngaih a ni a, a thi tih erawh Pathianni zing khan hriat chauh a ni. An nupa hian an fate nen an in, tlema fal deuhvah an khawsa a. Inrinni khan a pasal ramriak a rawn haw a, inhauh buaina an nei nia hriat a ni a. Pathianni zing khan a pasal chuan a nupui hi a muhlum niin a sawi a.
An in hi an thenawmte atanga metre 70 vela hlaa awm a nih avangin engtia thi nge tih hi hriat theih a ni lova. An fate chuan thil thleng chungchang hi an sawi mumal thei lo niin thudawnna chuan a tarlang a. An thawm midangin an hriat bawk si loh avangin Pi Manlianchingi thihdan hi a pasalin a muhlum tia a sawi bak chu midangin sawi tur an nei lova. Amaherawhchu an nupa hian tum dangah pawh inhauh buai chang an lo nei ve tawh thin a. Chuvangin nunna chan ta chhungte hian a pasalin a thihdan a sawiah hian an hmin zo lo thung.
Nimina a ruang an endik hnuah tukin khan Ngopa Police Station chuan tualthah thubuai ziaklutin, chhuizui a ni ang.
