September 29, 2023 khan Mizote kut pathum zinga mi Mim Kut chu urhsun taka hman a ni a. Kut hmanna aiin he kut puala logo insiamsiakin ngaihven a hlawh zawk a nih kha.
Logo insiamsiakah hian mi 54 ten an design an thehlut a. Jonathan Zorinpuia logo siam chu pakhatna atana thlan a ni a. A logo-ah hian vaimim a tel a. Hei hian social media-ah sawi a hlawh. “Vaimim leh mim kut hian inzawmna a nei lo, kan Mizo history kan chiang ta lo hle.” tih comment te a tam hle.
Mim kut hi chu mitthi pual kut a ni a. Mim char hnu, tunlaia August thla tawp lamah emaw September tir lamah emaw hian hman a ni thin a. Mitthi pual a nih vangin lusun hlim deuhte phei chuan tahna hunah an hmang a, an lung a leng em em thin.
A tobul nia sawi hi Mizo thawnthu Tlingi leh Ngama thawnthu atangin a ni. Tlingi thih hnuah Ngama’n mitthi khuaah a zuk tlawh a. Mihring khuaa a lo kir leh hnuah kumtin thlai tharte chu tuium hunna bulah Tlingi eiturin a thlaichhiah ta ziah a.
Mitthi tawhin eitur an nei lo bik ang tih hlauvin an thlai tharte chu tuium hun bulah chuan an thlaichhiah ve ta ziah a. Hetiang hian “Mitthi thlaichhiah” leh “Mim Kut” hi a lo chhuak a, kum tin an ching ta zel a. Mim kut hian vaimim nen inzawmna a nei miah lo. Mahse…
Mim Kut logo siamtu hian internet-ah a awmzia a zawng niin a lang. Mizoram Tourism Department chuan Mim Kut hrilhfiahnaah hian Vaimim kut an ti bawk a, August emaw September thlaah emaw an hmang thin tiin a hrilhfiahnaah an ziak mauh pek a! Social media-ah sawi a hlawh em avangin Mim Kut hrilhfiahna hi an paih leh tawh nghe nghe.
Hemi chungchanga Maipawl in a chhui chiannaah Mizoram Tourism Department hian Mim Kut hrilhfiahna, Vaimim Kut an tihah hian thu lakna (source) pawh an lo nei lem lova, Deparment-in an risk mai mai tih hmuh chhuah a ni a. Hrilhfiahna thar dah tur a ni e, an ti. Wikipedia-a hrilhfiahna la ni se chuan Mizo History thlak danglam deuh thuak thuakna hi a thleng lovang!
September thla tawpah Mim Kut chu hman a ni ta a. Logo pawh pakhatna an lo pe ve laklawh tawh si, an hmang tlang ta tho.
