Țau thla 9, 2024: Special court, ND&PS Act Champhaiin mi bail-tu mi pahnihte chu an mi bail-te an tlanbo avangin Lung in tang turin a hrem.
Court thu remnaa tarlan a nih danin Kum 2022, April thla khan Champhai Police-in Heroin Gram 125 leh a neitua puh hnam dang mi pahnih Rakib Uddin Laskar leh Siddek Ahmed Laskar-te chu an man a, Court chuan Heroin neitua puhte hi bail-a an chhuah a phalsak hnuah Zoremmawia , Champhai Kanan leh Lalremruata, Champhai Jail vengte chuan an mi bail-te hi an tlan bo emaw court hmaa an hruai thei lo emaw a nih chuan cheng nuai 1,50,000 ve ve chawi tura intiamin an bail chhuak a. An mi bail chhuah mi pahnihte hi bail-a chhuah an nih hnu lawk kum 2022 september thla atangin Court hmaa an inlan hun turah in lan tawh loin an tlanbo zui a. A bailtu mi pahnihte chu an mi bail-te hi vawi eng emaw zat court-a hruai tura hriattir an nih hnuah an hruai theih tak loh avangin an intiam ang ngeiin cheng 1,50,000 ve ve chawi tura hriattir an ni a, an pawisa chawi tur hi an pek theih loh avangin mi bailtu Pu Zoremmawia leh Pu Lalremruata-te chu thla thum chhung Lung in tang turin Special Court, ND&PS Act, Judge Liansangzuala chuan a hrem ta a ni.
District & Session Judge ni bawk Liansangzuala chuan mipuite chu Mizoram pawn lam mi thil tisualtute bail kawngah mi tam tak an lo chetsual tawh avangin fimkhur turin mipuite chah a, tun lai hian bungraw inthawnah ruihhlo man a tam thu pawh sawiin a kengtute chu dan hnuaia hrem an ngaih thin avangin tlawmngaih vang emaw, pawisa hlawh tur vang emawa thil inthawn kawngah hriat chian loh te laka fimkhur turin mipuite a chah bawk.
