Lai Autonomous District Council-a MNF Sorkar, Chief Executive Member V Zirsanga kaihhruai chu vawiinah thlawptu a neih dan fiah tura LADC Special Session koh nimah se, CEM hian banna a thehluh vangin ruahmanlawk angin Floor test hi neih theih a ni lo.
LADC Special Session hi ruahman lawk angin dar 10:30-ah tan a ni a, Chairman chuan CEM-in banna a thehluh thu sawiin, floor test neih theih a nih loh thu a sawi a, Session hi tiam chin awm lovin tih tawp zui a ni.
Elected Member 25 awmna Lai Autonomous District Council-ah hian MNF Legislature Party-a MDC 9 leh anmahni thlawptu BJP, INC, ZPM leh Independent Member pakhat theuh an vaiin MDC 13 te’n Larsap hnenah V Zirsanga chuan thlawptu a nei ngah tawk tawh lo tih an thlen hnuah Larsap ruahmanna angin LADC Chairman chuan V Zirsanga’n thlawptu a neih dan fiah a nih theih nan LADC Special Session chu vawiin chawhma dar 10:30 ah tan turin a ko a. Session tan hma chawhma dar 10:20 khan V Zirsanga chuan Chief Executive Member atanga a banna LADC Chairman VL Hmuaka hnenah a theh lut a ni.
LADC-a, CEM V Zirsanga hi Special Court (prevention of Corruption Act)-in eirukna thu buaia thiam loh a chantir a ni a. Court thu thluknaah hian a lungawi loh avangin V Zirsanga hi High Court-ah a zualko a, Court thu remna awmsa chu kalpui chhunzawm lo tura tih a ni.
