African Swine Fever leng thar lehah Champhai District chhungah Vawk 17 a thi tawh a; Champhaia ASF hri a len leh tak avangin Khawzawl District magistrate-in Bawk khuahkhirhna thupek a ti chhuak.
Champhai District chhung Leithuam khuaa kumina Vawk thite chu African Swine Fever avanga thi an nih tih finfiah tawh niin vawiin thleng khan Vawk 17 a thi tawh a; Leithum khua hi ASF hri lenna hmunah puan mek a ni.
African Swine Fever 3rd wave avangin Champhai District chhungah Vawk 240 an thi a, vawk 205 suat a ni a, African Swine Fever hian Khua leh Veng 13 a luh chilh a ni. AH&Vety Dept Champhai chhinchhiah danin ASF leng hmasa berah khan Champhai District chhungah vawk 549 a thi a, a len vawi hnihnaah Vawk 3852 thiin 4615 suat a ni a, ASF hri len atanga vawiin thlengin Vawk 9461a thi tawh a ni.
Champhai District chhunga ASF hri a len thar leh tak avang hian Champahi District thenawm Khawzawl District magistrate Pu K Lalrohlua chuan Vawk pul hri Khawzawl district a fihlim theihna turin Khawzawl district huam chhungah ram pawn leh district pawn atanga vawk leh vawksa lakluh leh thawnchhuah a khap a, vawk dam lo hralh leh talh a khap bakah vawk dam lo neite chu AH&Vety Dept hriattir vat turin a hriattir bawk a ni.
