Vawiin khan MNF Party chuan Mizo Hnam Runah chhung inkhawm an nei a, he huna thu sawitu MNF President Zoramthanga chuan MNF chu kum tharah an insiam tha vek dawn a, a siam that ngai zawng zawng an siam tha ang a, rawtna zawng zawng pawh an ngaithla vek dawn niin a sawi.
MNF President chuan Mizoram Legislative Assembly inthlan neih zawh takah MNF Party-in MLA 10 lai Pathianin a pe chu lawmawm a tih thu sawiin hlawhtling lo zawkah tang mah se, tun inthlan result chu an thatna tur zawka Pathian remruat a ni tih an pawm tih a sawi a, chak zawkin hei aia tha hian an kal ang a, an tho kang leh ngei dawn tih sawiin an sorkar loh avangin an zavaiin an na tih a hriat thu sawiin Pathian remruat chu dan rawh zual a ni lo a, ZPM sorkar turin Pathian in rem a ruat a ni tih pawm thiam a, Pathian in zoram hi han enchhin ve reng reng a duh a ni” a ti.
Zoramthanga chuan MNF party ten an sorkar chhungin thil tam tak Zoram a that theih nan development tam tak an khawih ni-a sawiin an tlin lohna lian takah hian Development that loh vang leh MLA candidate neih that leh that loh a ni lo va Pathian in an tana rem a ruat a ni tih an pawm thlap tih a sawi a, MNF party chu Party dang ang a ni lo a, Hnam thuthlung vuan tlattu leh Nationalism keng kawhtu, Pathian leh kan ram tan a din kan nih angin Pathianin MNF party a sorkar leh theih nan kawng a sial sak leh ngei dawn a, an tho kang leh ngei dawn niin a sawi bawk.
