Mizoram Board of School Education (MBSE) chuan Dt.3.6.2021 khan High School Leaving Certificate (HSLC) Examination 2021 result a tichhuak a. Mizoram pumah exam chhangtu zirlai 18012 atangin 14847 an passed chhuak a. Compartmental exam tur mi 309 leh failed zirlai 2856 an awm. District hrang hrang dinhmun enin han hniam fal tak an awm lova. Result-ah hian khawpui leh thingtlangah danglamna a awm lo. Thingtlang zirna in thenkhat chuan candidate 100% passed thei te a nei hial.
Kum 2020 khan hripui leng avangin zirna a khaihlak a. Kumtawp lamah zirna in hawn tum ni mah se hostel-a lut tur zingah hri kai hmuh chhuah an pun leh tak avangin khar a ngai leh. January thla atanga exam an tan hma, thla hnih chhung vel chu inbuatsaihna hun an nei a. MBSE chuan exam hi kaltlangpui a tum avangin HSLC syllabus hi a paih then a. 50% vel paih a ni. Hemi hma zawng hian zirna chu online hmangin an kalpui.
Online class hian awmzia a nei nep hle
Online class a sawt lo:
Online class nei tur hian thingtlang kilkhawra mite chu an buai hle. Tuipui RMSA Higher Secondary School zirtirtu-in Maipawl a hrilh danin, “Kan khuaah chuan internet a awm loh avangin class lak theih a ni lova. Hrileng a ziaawm deuh lai khan class kal lovin zirtirna pek dan kan ngaihtuah a. January thla kha chuan an exam tur kha chu kan cover zo hman deuh thuak.” a ti. Internet connection nei, mahse class kal tura phone nei lote chuan online class-ah hian buaina an tawk bawk.
Khawpui lama internet connection nei tha school te pawhin online class hi kal mah se awmzia a nei nep hle niin an zirtirtute chuan an sawi.
HSLC-a an candidate zawng zawngte passed vek thei school pahnih zirtirtute chuan, “Online class hmang hian zirtirna pe mah ila, naupangin eng chenin nge rilru an pek tih hriat thiam a har. Zirlai zingah ti tak tak awm mah se a tam zawk hi chuan an ngaihsak lo hle a. Assignment kan pekte pawh an rawn in copy chhawng tlangpui.” tiin Maipawl an hrilh. Bethel Mission School Principal Nelson Khiangte chuan, “Youtube-ah lecture video ka dah a. Mahse view zat atangin zirlaite chuan an en meuh lo tih a hriat theih. Online class hi chu duhthlan tur dang a awm loh avangin a hmingin kan kalpui” a ti.
Online class-in awmzia a nei lo nia an hriat laiin HLSC result chhuakah pass percentage a sang em em lawi si a. A chhan chu hengte hi an ni.
1) Syllabus sawr zim:
MBSE hian exam nei loh a duh loh avangin syllabus a sawrzim ta a. Zirlai tan chuan zir tham tak la ni mah se hei hian a chhawk hle. Sorkar enkawl school pakhata English subject zirtirtu chuan, “Syllabus pangngai ang khan exam dawn ila chuan kan zo hman lo hle ang. Grammar bikah a harsa lai deuhte an rawn paih then a. Passed tawk tawk tura ka ngaih zirlai zingah mark 60 rawn hmu tlingte an awm.” tiin a sawi. Syllabus sawrzim a ni chungin zirlaite chuan kum danga exam tura inbuatsaihna, study camp chu thla hnih vel an nei thei a. An zir tur chin hi nal zawka zir theihna hun an nei.
2) Sample questions:
Zirlaite pui turin kuminah MBSE chuan Sample Question Papers a tichhuak a. MISSTA leh MISA ten Question Bank an tichhuak ve bawk. Exam an chhan thiam theihna tura Sample Question Papers leh Question bank tihchhuah atang hian exam tak takah zawhna tam zawk a chhuak. Zirtirtu pakhat chuan, “Sample Question chauh kha zir se, passed-na khawp chu chhan theih ang.” a ti. Sample question papers leh question bank hi siam khap a nih kumah passed percentage a tlahniam ziah nghe nghe.
Hemi chungchanga Maipawl in zirtirtu a biakte chuan kumina HSLC result that chhan ber chu syllabus sawrzim leh sample question papers vang hi nia an hriat thu an sawi.
3) Hostel:
Zirna in khar mah se Private school thenkhat, hostel neite chuan zirna hi an kalpui thei reng a. Top 10-a lang zingah Private school zirlaite an tam chhan ber niin an zirtirtu thenkhatte chuan an sawi.
Heng piah lamah hian exam paper endiktute chuan mark an ren lo tih s ubject khata mark hmu sang tar chhuah atangin a hriat theih bawk a. Mathematics leh Science-ah full mark hmu an awm a. Full mark hmuh theih lohnaa ngaih subject: English, Social Science leh a dangte-ah mark 99-97 hmute an awm thei bawk.
Zirna a buai miau avangin insiamrem a ngai a. Passed pui kum chu a ni lo thei lo. Zirlaite chu thiam hlei lovin MBSE hian a passed tir vak vak tihna erawh a ni lo thun
g tiin zirtirtute chuan an sawi. “CBSE chuan pawl 10 leh pawl 12 exam lovin zirlaite chu pawl a sawntir a. Thiamna engemaw tal an neih beiseiin exam hi kan la kalpui hram a. Failed an la tam lutuk zawk e!” an ti.
Hrilen loh laia zir chhuakte chu an phak lo ang tih a hlauhawm
A nghawng tur:
Zirlaite hian zirtirna an dawn fumfe loh bakah, online class chuan classroom chhunga zirtirna a thlak zawh loh hle avangin kum 2020 leh kum 2021 a zirlaite chuan an zirlai an bel lo hle dawn nia a hriat thu sorkar enkawl school-a zirtirtu pakhat chuan Maipawl a hrilh.
“Tuna pawl 10 leh pawl 12 passed chhuakte hi College-ah emaw, MBBS leh Engineering lam emaw zir pawh nise an zirlai a tlem phah dawn chuang lova. Hrilen loh laia zir chhuakte chu an phak lo ang tih a hlauhawm” a ti a, “Naupang school kal tantirte pawh zirna an dawn mumal loh avangin an thuanawp hlein ka ring. Mahse hrileng karah chuan hei bak lo chu zirna kalpui dan a awm chuang bawk si lova. Hrileng a ziaawm hunah tan khawh hle chu kan ngai ang.” tiin a sawi.
