Hrileng thawh hnihna kan hriat dan a dik lo

Covid-19 thawh hnihna avangin mi 91 in nunna an chan ta. Thihna tam zawk hi tun thla thum: April-June thla chhungin a ni. June thla tirah khan Mizorama hrileng chu Delta Variant a ni tih laboratory-a endikna atangin hriat a ni tawh bawk. Hrileng thawh hnihna kan hriat dan leh mithiamte thil hmuh chhuahah inang lo a awm.

Mizoramin hrileng thawh hnihna a hmachhawn tirhah khan MOT Chairman Dr ZR Thiamsanga chuan tun hrileng hi a natna a lang chhuak nasain a, thalai hrisel thate pawhin an tuar na tih a sawi. He hri avanga nunna chan zingah hian kum 20 bawr vel an awm rualin thihpui tam ber chu kum 50 chunglam, natna benvawn nei sate an ni. Damdawi ina luhpui ngai damlo zingah oxygen pek ngai an thahnem hle a, delta variant hi a thawk na ta bik nia ngaih theih tur a ni.

A thawh hnihna rawn thlen hma khan he hri avanga nunna chan chu nei ve mah ila damlo tam zawk chu CCC-ah enkawl dam an ni a. Hri kaite enkawlna ber ZMC-a phurh luh ngaite pawh chuti lutukin enkawl an ngai lem lo. Thihpui kan tam hma phei kha chuan he hri hian min ngam loh bikna riau neiah kan ngai hman. Kan thil ei hrawmhraw leh kan chenna te chu mawhpuhah kan nei deuh ber a nih kha. Hrileng thawh hnihnaah insiam danglam tawhin min rawn tuam ta a, June thla chhung phei nitin deuhthaw nunna chan hriat tur an awm ta a. Oxygen leh ventilator kan indaih lo mai ang tih te kan hlau hman rum rum. Delta variant hi a thawk na ta bika mawhpuh theih tak tur chu a ni.

Vellore-a Christian Medical College chuan he Delta Variant chungchangah hian zirchianna an nei tawh a. Hrileng thawhkhatna ai khan 50% velin inkaichhawn a awl zawk tih an hmu chhuak. Tun hnaia hri kai 90% chu Delta Variant vang hi ni turah an chhut a. He hri insiam danglam avang hian Africa ram thenkhat chuan hrileng thawh thumna an hmachhawn leh phah tawh a. Kan fihlim e ti thei Israel-in hmai tuamna an vuah tharin Australia pawh an inralring chho leh mek.

Mahse an zirchiannaah hian Delta Variant hian natna a thlen zual em? tih erawh chu an chiang lova, an data neih atangin thutlukna an siam ngam lo. Chiang tak sawi tur chuan data tam zawk kan la mamawh, an ti.

Scientific research atang hi chuan tun hrileng thawh hnihna a thawk na a, thalaite pawhin an dam lohpui nasa tih chu a takin hmu mah ila behchhan awm lo a ni ta a. Hei hian thil pahnih a kawk thei. A thawk na ngei tih hi an finfiah tho tho ang tih a nih loh chuan hriselna lamah Mizote hi kan la hniam hle a, kan hniam tih pawh kan inhre lem lo tihna a ni. Inkaichhawn a awlsam tak avangin natna benvawn nei emaw taksaa natna do pawl nei chak lo emaw hrileng thawhkhatnaa him, a thawh hnihnaa kaite chuan an tuar na ta hle tihna a ni thei. A thawk na zual tih hi insawithaihna leh fimkhur tura inchahna atan tak kan hmang a. Mahse hei hi finfiahna awm lem lo a ni.

Ni 100 chuang kan inkharkhip hnuah pawh hrilai punna zat chu a tlahniam mawh hle a. Hei hian Delta Variant chu inkaichhawn a awlsam tih a nemnghet. Mithiamte chuan a damdawi hian delta variant lakah min veng thei a, dose kima lak chu inkaichhawnna pawthniam turin a pawimawh ber pawl a ni, an ti.

Hetihlai hian delta plus variant an sawi leh tawh a. India ramah state 11-ah hmuh chhuah a ni leh der tawh. He hrileng hian kum hnih chhungin ziaawm lam a pan tak tak thei lova, a insiam danglam rawn chhuakte hi lungkham thamah mithiamte chuan an ruat avangin zual lam a pan zel niin a lang bawk. Hri do kawngah kan inkaihhruaina chu a tawk lo tih a lang chiang tawh a, a thawh hnihna bakah hri insiam danglam leng leh thei do kawngah hian ruahmanna felfai zawk leh zirchianna mumal zawk kan neih a tul hle. Rinthu mai maia kal lovin!