Vawiin khan Zokhawthar bul Khawmawi leh Rih-ah Covid 19 kai mi 30 hmuhchhuah a ni a; An zinga 27 te hi Khawmawia hmuhchhuah niin mi 3 te hi Rih-a hmuhchhuah a ni thung.
Vawiin hian Sample 119 endik niin Sample endik atanga chhutin hri kai hmuhchhuah zat hi za zelah 25.21 a ni. Hri kai zinga na zual mi 2 te chu Rih Damdawi Ina hri kai te enkawlna tur Ward siam bikah dah luh nghal an ni a; Heng khaw pahnihah te hian hri kai enkawlna tur hmun bik siam a nih loh avangin mi dang 59 te chu in lamah khunghran an ni.
Myanmar ram Chin State-ah hri kai an pung nasa hle nia sawi a ni a, hei vang hian Hualngo Land Development Organisation chuan Khawmawi leh Rih-a hri kai leh kai lo hriatna tura sample endikna hmanrua Rapid Antigent Test chu a thlawnin an tumsak a; Mizoram ramri lawka awm Zokhawthar nena inkal pawh reng theih Khawmawi leh Rih-ah hian Sample 285 endik tawh niin hri kai mi 61 hmuhchhuah tawh a ni a, an zinga mi 57 te chu Khawmawi khua niin mi 4 te hi Rih khua an ni.
Heng khaw pahnihte hi Zokhawthar nena in kal pawh reng reng an ni a, tun hnaia Zokhawthara hri kai hmuhchhuah an pun tak hluai avangin Khawmawi leh Rih hi an him lo hle ang tih chu rin dan sa a ni a; June ni 7 atangin hri kai leh kai lo hi endik tan a ni a, ni 3 chhung leka hri kai hmuhchhuah dan atangin khaw pahnite dinhmun hi a tha lo hle.
