Hmeichhe naupang kum tlinglo Pawngsual tu Laldinsanga chu kum 10 chhung lung in tang turin Court-in a hrem.
Champhai District Fastrack Special Court Presiding Officer/Judge T Saikunga chuan nimin khan hmeichhe naupang kum tling lo pawngsual thubuaiah Laldinsanga, Zawngtetui khua chu thiam loh chantirin kum 10 chhung lung in tang tur leh cheng 5000 chawi turin a hrem a; Laldinsanga hian POCSO Act hnuaiah thubuai pali a awrh a, a vai hian thiam loh chantir a ni.
Thubuai a awrh zinga pahnih hi he POCSO section 10-na hnuaiah niin kum 5 chhung tang tura hrem a ni a. Section 12-na hnuaiah thubuai 1 neiin kum khat tang tura hrem a ni bawk. Section 6-ah thubuai pakhat nei lehin hetah hian kum 10 chhung tang tur leh cheng 5000 chawi tura hrem a ni a. Hremna hi a ruala kal tur a nih angin pawikhawia puh Laldinsanga hi kum 10 chhung tang tura tih a ni ta a ni. Laldinsanga hian a pawisa chawi tur hi a pe tla thei lo a nih chuan thla hnih dang a tan belh leh dawn a ni.
A pawikhawih hun hi kum 2018 niin kum 2023 khan thubuai ziah luh a ni a. A pawikhawih hunlai hi POCSO Act Section 6 hremna ennawn hma a nih avangin kum 10 chhung tang tura tih a ni a. Hremna ennawn hman nise chuan kum 20 thleng lung ina khung tura hrem theih a ni.
