Vote 1:
Inthlan laia kan vote 1 chauhte chuan awmzia a nei tak tak lo em mai tih hi chu a dik chiah lo. Rajasthan Chief Minister atana an hual CP Joshi phei chuan a hrechiang viau ang. Kum 2008-a an state inthlanah Joshi hi Kayan Singh Chauhan nen an inkhing a, Joshi hian vote 62215 a hmu a, a elpui Chouhan chu vote khatin a pha lo. Vote khat leka chak loh hi vote nuai chuanga chak loh aiin a thanatthlak zawk e, an ti thin a. Joshi pawh hian vote chhiar sual palh a awm a ni ang e tiin a chhiar nawn tir a, mahse dik lo a awm lo. A pawi lai tak chu Joshi-a hi vote 2 a chak thei tur a ni. A nu, a nupui leh an driver te chuan vote thlak lovin temple lamah hnehna a chan theihna turin an lo va tawngtai a, Joshi hian vote an thlak ve lo tiin High Court-a vote thlaktir a dil leh hnuhnawh a, mahse court-in an lo pawmsak ta lo thung.
Vote 1-a chak rau rauvah kum 2013 a Carintha khua, Austria-a mi chak dan hi a runawm zual. Green Party leh BZO party te an inel a, Green party hian vote khatin hnehna an chang a. An chakna vote ber kher lah chu tilte lem a ni. Vote thlakna rinbialah pakhat chuan tick ta mai lovin tilte lem a lo ziak pek a, a ballot hi pho chhuah ni lo mah se vote chhiartute chuan hei hi an nemnghet thung. Tick kher tur tih dan a awm lova, rin chhungah tak lem a ziah avangin an pawm a. Tilte lem avangin hnehna an chang. UK lamah pawh hetiang deuh hi kum 2015 ah khan a thleng tawh Conservative MP Glyn Davies chu thlan tlin a ni a, vote thlaktu zinga pakhatin lungawilohna lantirna atan tiin Davies chu tilte lem hmangin a vote a. Davies hian hemi chauh lo deuh hmangin hnehna chang tho mah se he vote thlaktu common lo tak hnenah hian lawmthu a bik takin a sawi nghe nghe.
Vote 1 hmanga chak loh thanatthlak lai hian vote 1 hmanga chak chu a lawmawm duh viau dawn a, Marcus Morton phei hi chu vote 1 hmangin tum hnih lai mai a chak thei. Kum 1839 ah khan Massachusetts governor inthlanah vote 51034 a hmu a, a khingpui chu vote khatin a hneh a. Kum thum hnua an inthlan lehah pawh vote khat bawkin hnehna a chang leh a ni.
Inthlana hnehna changtu dangdai te:
Kum 1967 khan Ecuador-a Picoaza khua chuan Mayor an thlang a, an thlan chhuah chu, lighter pathum cheng 10, pheikhawk uih rehna tih laia pheikhawk uih rehna tak hi a ni. An inthlan hma hian ke hnawih siamtu Pulvapies te chuan advertisement an tichhuak a, candidate te campaign aiin an thawk tha zawk ni ngei tur a ni. An campaign au hla chu, candidate tu pawh i vote thei. Mahse thianghlimna leh faina i ngai pawimawh a nih chuan pulvapies ngei vote ang che, tih a ni a. Inthlan boruak kara an thil siam chhuah lo chawilarna remchang tak a ni. Mayor chu an thlang ta tak tak a, pheikhawk uih rehna hi Mayor atan an thlang chhuak nawlh a, Mayor nihna erawh chu a chelh ta lova, faina leh thianghlimna lamah pawh hmalakna a awm chiah lo thung.
Brazil inthlanpuiah phei chuan mipuiin an politician te tielna atan chawktak khuka khukpui loh chi tih tawngkam atan an hman clown chu congressman atan an thlang tling a, lehkhathiam lo lehnghal a ni. Brazil inthlanah pawh hian India ram ang deuhvin tling miah lo tur lo chuh ve chhen an awm a, he clown pawh hi chumi zingah chuan a tel ve ni awm tak a ni. Congressman nih hi a awmzia pawh ka hre lova, mahse min thlang tling a nih chuan a awmzia chu ka hrilh ve dawn che u nia tiin a campaign thin a, thlan tlin a ni ta tak tak. Ka tlin chuan tia a thutiam te phei chu hruaitu atan itawm loh angreng tak a ni, engmah ka ti lovang tih te a ni a. Congressman nih awmzia hriat ka tum ang a, a tawk viau e, a ti chungin vote maktaduai 1 leh nuai 3 chuang a hmu thei a, a elpui aiin vote hi a let hnih thuakin a hmu tam zawk.
Italy-a khaw pakhatah thung chuan an hruaitu atan nih tum lo pui an lo thlang chhuak tawh bawk. A hming chu Fabio Borsatti a ni. Inthlanah hian a thianpa a ding a, chuhtu an awm lo. Chuhtu awm lova ding chu vote thlak turin mi an rawn chhuak tha lovang tih hlauvin a thahnem ngaiin voters te hipna atan tlin pawh tum lovin a hming a pe ve ta a. A chhungte pawhin an vote lo chungin Mayor atan an thlang tling ta tho a, an khuaa mi 507 atangin vote zaa 58 a hmu a ni.
Borsatti hian mipui duhdan zahin Mayor hna a chelh a, politics lama inhnamhnawih ngai lo a nih avangin a buai hle. An khua hi tourism lamah a chawisang ta hrep a, a thlan tlak viau a ni.
An khaw hruaitu atana nungcha an thlan phei chu a tam a, mitthi te pawh tlan tlin an lo ni tawh. Kum 2009 ah khan Florida leh Alabama-ah an khaw hruaitu atan mitthi thlan tlin an ni. Florida-ah hian Earl Wood khuaah a ni a, kum 96 a upa chuan Mayor a chuh ve a, an campaign laiin a thi palh hlauh a, heti chung hian vote zaa 56 a hmu thei a. Inthlan a chuh chhan hi candidate zingah hmel huat zawng tak a neih vang a ni. Alabama lamah thung chuan Bibb County Commissioner-ah kum 77 a upa chu inthlan hmain a thi a, vote zaa 52 a la hmu pha tho a, ani hi chu party ruihchilhna vang niin a lang, Republican hovin an vote deuh suau a ni. California lamah pawh Senator inthlanah Jenny Oropeza chu a ding ve a, inthlan hma kar khatah a thi a, voters lamin rilru ka siam fel vek tawh an ti te pawh a ni maithei, chiang takin hnehna a chang ta tho.
Iraq inthlan:
Kum 1979-ah an paihthlak tak Saddam-a khan Iraq-ah thuneihna a chelh tan a, dictator a nih avangin inthlan buatsaih awm loh tak a ni. Mahse kum 1995-ah khan inthlan buatsaih a ni a, chuhtu phei chu an awm chuang lem lo. An inthlan chu aw leh aih tia chhan chi a ni a, Saddam-a hi President atan i pawm em tihah vote an thlak a, aw tih lamah hian vote zaa 99.99 a tla a, mi tlemtein aih tihah vote an thlak ve thung. Kum 2002-a US in a run dawn hnaihah khan hetiang chiah hian inthlan a huaihawt leh a, chiang takin hnehna a chang leh a, hemi tum phei hi chuan campaign te pawh a nei ve nghe nghe a, radio-ah chawl lovin ka hmangaih reng ang che u tiin mipuite a chah a ni.
Kim Jong Un-a a thi, a thi lo tih bawr vel karah North Korea pawhin inthlan hi an nei ve a, an Parliament, Supreme People’s Assembly-a thu tur chu kum 5 danah an thlang ve thin. Rinlawk ang ngeiin district tinah candidate pakhat, Jong Un-a ruatte an awm tlangpui a, vote thlak pawh ualau takah an nei thin. Inthlanah hian vote a tla tha thei hle, kum 2014 ah khan vote zaa 99.97 a tla a, a chhan chu inthlan hi chhiarpui a nih pahfawm avangin vote thlak ngei ngei tur a nih vang a ni.
Liberia inthlan fair lo:
Africa-a Liberia ram lian lo takah hian kum 1927 khan president-ah Charles DB King chu thlan tlin nawn leh a ni a, an fair lo mai mai vote 234000 a hmu a, mahse an ramah vote 15000 chiah a awm thung a. Vote nei hlei lovin vote an thlak a nih loh vek chuan vote lem a tam hle dawn tihna a ni. King hian thuneihna phei chu a chelh rei ta lem chuang lova, kawng leh thil dang siamnaah sal an chhawr avangin paihthlak a ni a. He inthlan hi khawvela inthlan awm tawhah chuan a fair lo bera ngaih a la ni.
New Zealand inthlan boruak: India rama inthlan boruak a sosan theih tehlul nen New Zealand lamah erawh chuan an reh thap zel. Election kaihhnawiha fakna tihchhuah an khap a, candidate te social media page te pawh khuahkhirhsak niin TV lamin inthlana chak tur rinlawkna ang chi reng reng an huaihawt thiang lo bawk a ni. Hetiang inthlan campaign an khuahkhirh chhan hi voters te rilru sukna leh hruaikawina chi khatah an ngai a, an vote duh takte chu an hria a, inthlan campaign hian an rilru a hruai kawi mai mai zawk tiin Election Commission lam chuan an ham strick viau a. Dan bawhchhiate chu cheng tam tak chawitir theih an ni. MPF in pawisa em an puan chhuah thin ang bawr vel kha a awm hmel lem loh hle.
November Thawhlehni hmasa bera vote thlak chhan:
US President vote thlak hun chu an ram danpuiin November thlawhlehni hmasa ber thlak tur a ni, an ti thin a, a chhan chu loneihna vang a ni. Dan an siam hunlai khan America chu loneihna hmunpui a la ni a, vote thlakna hmun tur chu pan fe a la ngaih thin avangin Pathianni-a kal chhuah a ngai thin a. Chu chu Kohhranin a phal loh bakah November ni 1 chu Catholic te ni pawimawh, All Saints Day a ni a, chuvangin buh seng tawh hnu leh thlasik thlen tak tak hma, November Thawhlehni hmasa ber an ruat ta a ni.
Inthlan thutiam awihawm loh:
Kum 2018-a Zimbabwe inthlanah Zanu-PF chuan an inthlan campaign laiin mipuite chu kum 5 chhunga chenna in maktaduai 1 leh a chanve sak hman an tiam a, ni khatah in 822 zel an sa dawn tihna a ni a, inthlan thutiamah chuan tihhlawhtlin harsa tak tur a ni. Kum 1970 khan Colorado-a Aspen khuaah sheriff an thlang dawn a, Hunter Thompson-a’n a chuh ve a, a thutiam chu an khaw hming thlak a, Aspen ti lovin Fat City tih a ni tawh ang tih te, kawngpui kan neih zawng zawng kan tichhe vek ang a, mipuite chu thirsakawr leh ke hlira an kal a ngai tawh ang tih te a ni a, a tling lo chiang hle.
