July 1, 2024: Vawiin khan ram chhung hmun dang rualin Champhai Police Station pathum leh Champhai District Jail-ah New Criminal Law hman tanni pualin hun hman a ni.
Vawiin atangin IPC, CrPC leh Indian Evidence Act te thlakna tur dan thar pathum – Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) te hman tan a ni dawn a, Champhai Police Station-ah chuan SDPO Gavit Gogna, IPS hova hun hman niin Pu Gavit Gogna chuan dan thar hman a nih tawh dawn avangin Police-in chona thar an hmachhawn dawn tih sawiin New Criminal Law chu thil thar a nih tawh dawn avang leh Police-te thuneihna chin tihzauh a nih dawn avangtein fimkhur taka hremna pekte zirchian a ngah tur thu a sawi a; dan thar chuan mipuite thlavang a hauhnain police-te tha a tichak tawh dawn a, hna pawh a tihpun dawn avangin taimak chhuah leh zual a tul thu a sawi bawk.
Champhai District chhunga Police Station pahnih Zokhawthar leh Dungtlangah pawh OC-te kaihhruainain he ni pual hian hun hman a ni bawk.
Vawiin khan Prison Department, Champhai District jail buatsaihin vawiin atanga hman tan tur New Criminal Law chungchang zirho a ni bawk a, Resoure Person V Vanlalhriata, CJM chuan India rampuma criminal laws Pathum hman thar tur Bharatiya Nyaya Sanhita (BNS) – 2023, Bharatiya Nagarik Suraksha (BNSS) – 2023 leh Bharatiya Sakshya Adhinyam (BSA) – 2023 -te sawifiahin, New Criminal law chu thil thar a nih avangin inzir zel a ngai dawn a, thil thlak danglam a awm nual avangin Jail-a thawktute pawhin fimkhur takin dante an zir thar leh a ngaih thu a sawi a. Dan tharah chuan Police-te thu neihna pek zau an nih dawn bakah Police Custody-a kutkawl inbun tir phal loh ni thin chu inbun phal tir chin a awm tawh dawn tih sawiin New Criminal Law-a hriat tur pawimawh hrang hrangte District Jail-a thawktute a zirtir a ni.
Inkhawm hi Lalmuanpuia, Superintendent Champhai District Jail chuan a kaihruai a, R Lalmalsawma, Jailer-in thu a sawi ve bawk a ni.
Dan thar pathum te hian dan hmanlai tawh thenkhat a paih a, a then a kaikawp a, hman laia hriat ngai loh sualna thar lo chhuak te hremna dah belh a ni bawk a, khawi police station ah pawh FIR thehluh theihna Zero FIR te, online hmanga police hnena FIR thehluh te, sms leh thildang hmanga inkoh te, dan bawhchhiate hremna atana vantlang tana thil tha tih Community Service-te leh thil dang thahnem tak heng dan tharah hian dah belh a ni.
