Chief Minister thar Pu Lalduhoma’n ni za chhunga Sorkar tharin hma an lakna tur hrang hrang a sawi a, MSSSB leh SEDP, Resource Mobilisation Dept-te chu thiah nghal a ni dawn tih a sawi.
Pu Lalduhoma chuan an ngaih pawimawh ber tur chu kut hnathawktute a nih thu sawiin Sawhthing, Aieng, Hmunhphiah leh Hmarchate chu a minimum rate-a lei tura an intiamna chu an bawhzui nghal dawn tih a sawi a, an rate siam aia sanga an hralh thei a nih chuan an zalenna a nih thu leh rang taka thlai thar lei turin State marketting Board rang taka an din tur thu a sawi bawk.
Sum dinhmun chhia siam tha turin Financial Year lo thleng tur chu insawh nghehna atan an hmang phawt dawn tih sawiin kum khat chhung chu mipuiin an dinhmun siamthatna atan pe se a duh thu a sawi a, Finance Dept-a kum thar atana SEDP atana Vbch 150 dah that chu thu leh awm hma chu khawihchet miah loh tur a nih thu a sawi a, Minister tinte chu an dept chan theuh an enkawl dan tur ziaka an neihte dungzuiin an Dept-te enkawl dawn niin a sawi a; Budget thar tur chu ZPM Policy Oriented Budget a nih an beisei thu sawiin Dept tin-te chu Minster kaihhruaina ngai pawimawh-in ZPM Policy tinzawn budget siam turin a chah a; An Budget-ah Financial Year thar atangin chhiarkawp dik an hmang dawn tih sawiin engmah zep loin an nih ang angin an lang dawn niin a sawi a, Sawrkar sum mahni mimal account-a dah an la awm a nih chuah action lak ngai lo a, lo inchingfel turin a hriat tir a; Minister Office tinah Complaint Box leh Suggestion Box an dah dawn thu sawiin online-a tih theih an tum thu a sawi a, mitinin rawtna leh sawiselna an neihte thehluh theih a ni dawn tih a sawi bawk.
Pu Lalduhoma chuan inrenchem dan tur ngaihtuah turin Resource Mobilisation Committee an din tur thu sawiin a rang thei ang bera hnathawh tir an tum thu a sawi a, Minister hoin hma an hruai dawn a, MLA tana car thar lei tihtawp a ni dawn a, amah tiamin Minister-in motor thar an lei dawn lo a, hman tlak a la awm chuan a hlui an ring dawn a, Minister pakhatin motor pakhat leh a spare an kawl dawn tih a sawi a, Chief Minister-in 4th Grade 8 a kawl theih chu 4-ah tihniam nghal a ni ang a, Minister ten 4 an kawl theih chu 2-ah, MLA ten 2 an kawl theih chu 1-ah tihhniam a ni dawn a. Bang la an luah tur chu thuam that ngai a awm a nih loh chuan a awm ang ang an chhawm tur thu a sawi a; Sorkar building-a bungrua zawng zawng chu thlak a ngaih hunah mizo siama thlak zel a nih tur thu a sawi a; Minister-te an zinin in zui dum dum te, school naupang inhmuah tir leh inzawn khap a nih thu leh khualliana tan zut an tum loh thu a sawi bawk.
Chief Minister chuan Work order issue tawh hna lo tan tawh zawng zawng chu pakhat mah an cancel dawn lo tih sawiin a that leh that loh erawh an enzui dawn a, hna chhiain bill an lak loh tur thu a sawi a; issue tawh hna lo la tan lo erawh chu stay vek tur a nih thu leh restricted tender reng reng Chief Minister approve lovin pakhat mah tih loh tur a nih thu a sawi a, CBI hnenah General consent arang thei ang bera an pek tur thu sawiin project zawng zawng endik turin Monitoring Committee an din dawn a, sorkar leh ZPM hotute chauhin an endik dawn lo a, recognise Party tin atangin pakhat theuh, NGO, MKHC leh MPF atangin mi pakhat theuh an thu dawn a, an remtihna lo chuan eng contract mah an pawhsei leh revise a ni dawn lo tih a sawi a, MSSSB leh SEDP, Resource Mobilisation Dept-te chu thiah nghal a ni dawn tih sawiin Boundary Committee mipui aiawh kim thei ang ber turin an din dawn tih a sawi a, Right to Public Service act pass tawh chu a taka hmang nghal turin Dept-tin te a chah a, ruihhlo tih takzetin an do dawn tih a sawi bawk.
Chief Minister chuan Hun hman dik chungchang sawiina hun takah a hmun taka awm turin Dept tinin biometric attendance system hmang vak turin a hriattir a, office-ah inkhelhna bungrua engmah a awm tur a nih loh thu sawiin ai kal leh mahni post lo a awm te January thla ral hmaa in report vek turin a hriattir a, Eiru lo tura puitu leh venpuitu ni turin an chhung khat laina leh thian tha te leh party hruaitu te, officialte an ngen a, hlemhletna do turin mipuite tanhopuiah a sawm bawk.
Pu Lalduhoma chuan Sorkar thar chuan Kal la tisual leh tawh suh tih chu an vawng reng dawn tih sawiin tunhmaa thil lo kal tawh in chhui vak vak an rilrua a awm lo a, dikna rorel a intan tawh hnua tisual lehte chungah erawh chuan an khauh tawh dawn niin a sawi a; Social Media-a inbeihnaain Politics a tihbawlhhlawh avangin an enzui zel dawn tih sawiin zalen taka duh duh sawi chu an palzam mai mai dawn lo tih a sawi a, fake account hmanga mahni hming pawh tilang ngam loa mi beitute chu an chhuichhuak zel tawh dawn niin a sawi bawk.
Loh theih loh a awm a nih loh chuan Political Transfer tih ve loh hram an duh thu sawiin Politics avanga transfer lo tawk tawhte erawh chu an chungchang duhsak takin an rel lo thei dawn lo niin a sawi a; Official-te chu zalen takin an zalenna hmang se a duh thu sawiin Sorkar hnathawk leh an chhungte chu chep taka siam an duh loh thu sawiin an zalenna tha taka an hman a duh thu a sawi bawk.
