Champhai Police-te chuan Chalbawia Junction Khankawn Police Check Gate ah Auto Rickshaw atangin Methamphetamine thahnem tak an man a, heng Meth te hi Bualchunga, Champhai Dinthar Veng ni-a insawi leh Lalrochhara, Champhai Vengthlang North nia insawite hnen atanga an man a ni.
Champhai Police te sawi danin, Lalrochhara hian Maxi Cab hmanga Check Gate paltlangin Gate thlang hla vak lovah a u Bualchunga a lo nghak a, Bualchunga hian Champhai Police te’n Auto Rickshaw an endik ngai vak lo ni-a hriain Auto Rickshaw hmangin Air Bag pahnih chhunga secondhand thawmhnaw hmanga khuhin heng Meth-te hi a phur thla a, a nau Lalrochhara zuk hlan tur a ni. Champhai Police te chuan Auto Rickshaw hi lo endiki. Air Bag pahnih chhungah Meth hi an man ta a ni. Gate thlanga lo nghaktu a nau Lalrochhara pawh Champhai Police te hian an man nghal a ni.
Champhai Police te Meth man hi mum nuaih 2 niin Kg 22.35 a rit a ni a, cheng nuaih 22 sing 3 sang 5 hu a ni a, a neitua puhte hi ND&PS Act. hmangin thubuai siamsak an ni a, vawiin khan District Court ah hruai niin Lung In ah khung nghal an ni.
