Champhai District Police-in Methamphetamine leh Heroin tam tham tak leh a neitua puh mi 3 an man.
Nimin chawhma dar 11:00 khan Dungtlang Police-te chuan Dungtlang Police checkgate paltlang tur car pakhat an endik atangin Heroin hawng 1-Gram 12.21 a rit an man a; Assam Rilfes nena tang dunin uluk zawkin lirthei hi endik ni mah se, ruihhlo dang man belh an nei lo a, a neitu-a puhte hi thu zawhfiah turin lirthei nen Champhai Police station-ah hruai phei an ni a; tukin khan lirthei hi uluk zawka endik a nih hnuah ruihhlo dah rukna tura siam hmu chhuakin Methahetamine Kg. 11 leh Gram 397 a rit leh Heroin Hawng 18, Gram 218 a rit a man zui leh a ni.
Lirthei khalhtu leh a neitua puh Abu Tahir Mazumdar, Hailakandi Silchar ni-a insawi leh a thurualpui ni-a hriat Mizo pahnih HT Vanlalzari leh Zothanluaii, Champhai Zotlang ni-a insawite chu manin ND&PS Act (c) hmangin thubuai siamsak an ni a; Vawiin khan Champhai District Court-ah hruai niin Lung inah khung nghal an ni.
Champhai Police-te ruihhlo man hi ruihhlo a hlawma tawlh rukna, Commercial Quantity a tlin phak avangin a neitua puhte hi court-in thiam loh a chantir a nih chuan kum 10 aia tlem lo lung in tang tura hrem theih an ni.
Champhai Police-te chuan ruihhlo a hlawma tawlhrukte hi a tlangpui thuin State pawna thawn chhuah leh tur a nih thu sawiin a tlem thama tawlhrukte erawh chu Mizoram chhunga vawrh darh tur a ni thin tih an sawi a, a hlawma ruihhlo tawlh ruknaa inhnamhnawih tam zawk chu hnam dang niin Mizo thurualpui an nei thin niin an sawi bawk.
