June 22, 2024 : Champhai Police-te hian tukkin dar 7;30 khan Champhai Police Checkgate, Chalbawia Junction paltlang tur lirthei pakhat dawnfawh phur an endik a, dawnfawh hnuaia thuhruk kuhva rah ro ip 80 an man a, ip khatah hian kuhva rah kg 60 zel awmi a vai hian Kg 4800 a ni a, tualchhunga hralhnaa chhutin cheng 312,000 hu vel a ni. Champhai Police-in kuhvarah an mante hi dan anga hmalak zui turin vawiin khan Custom Preventive Force Champhai kutah an hlan nghal a ni.
Tun hma angin Kuhvaro tawlh ruk hi hluar tawh lo mah se, a khat tawkin Police, Assam rifles leh Custom Preventive Force-te hian an la man reng a, he tih lai hian tun hnaia India leh Myanmar insumdawn tawna kawngpui – International Border Trade road paltlang Lei pahnih bom hmanga tihchhiat a nih avangin Myanmar atangin Kuhva rawn lut hi a awm mumal tawh lo niin Maipawl thu dawnna chuan a sawi.
June ni 19 khan Hachhek bial kuhva chingtu pawl, Vairengte leh Bilkhawthlir kuhva chingtu co-operative society-te chuan Home minister Pu K Sapdanga hnenah june ni 30, 2024 ral hmaa Vairengte leh a chhehvela ram dang atanga dan loa kuhva lakluh dahkhawmna kudam thianfai turin ngenna an thlen a, Mizorama kuhva tharte certificate of origin pek chhuah dan tur sorkarin a siam thar chu kuhva chingtute tan thil harsa leh ram dang kuhva dan loa lakluh dona atana him tawk lleh hman chhunzawm tlaka an ngaih loh thu an thlen bawk a ni.
