Rev Chinzapauva memorial Inter Village Football Tournament khelh mekah vawiin khan Venglai leh Vengthlang North-in an khingpuite hnehin Semfinal an inhlangkai.
VENGLAI 2-0 KANAN
Vawiin inkhel hmasa zawkah Champhai khawpui chhung team tha pahnih Kanan leh Venglai an inkhel a, Ist half chhungin team pahnihin goal khung theihna hun tha an neihte an hmang tangkai thei lo ve ve a, Kanan lamin an player pawimawh pahnih Ramsanga leh Tharpui inhliam avangin an chhawr theih loh an tuar a tih theih ang. Min 55-naah Venglai player langsar Chhana pet chu tha deuhin Kanan Keeper Tanpuia’n a dan sak a, Venglaiin Corner kick an hmu; he ta tanga ball kal hi Lalchhanhima Sailo-in mawi takin kheng goal a, Venglaiin goal 1 in hma an hruai. Hun tawp lamah Kananin an siphurh sut tumin nawr viau mah se, a pawimawh ber goal an khung thei lo. Min 95-naah Kanan defender-te ball pet sual kal zelah K Lalremmuana’n box pawn atangin mawi zetin Keeper ban phak loah a pet lut a, Venglai goal 2-na a khung a, hun tawp zuiin Venglai hian si 2 faia hnehna changin final an inhlangkai ta a ni. He inkhelah hian Venglai goal 2-na khungtu K Lalremmuana chu man of the match-ah thlan a ni.
VENGTHLANG NORTH 1-0 KAHRAWT
Inkhel hnuhnung zawkah Vengthlang North leh Kahrawt an inkhel a, Ist half-ah team pahnihte an inbei tawk hle a, Kahrawtin inkhel bul tan tha zawk mah se, goal khung hmasa zawk erawh Vengthlang North an ni. Inkhelh tan tirhah Kahrawtin goal khung theihna hun tha an nei nghal a, inkhel enkawltu lamin offside-ah an ham sak. Min 46-naah Vengthlang North-in Team goal dik tak an khung. Vengthlang North hian goal kick atanga ball in pe kualin vawi 7 an in pass kual hnuah Kahrawt lamin ball an deh ve hmain Lalrema’n a hmawr bawkin Vengthlang North tan a pet goal.
2nd Half-ah Kahrawt rawlthar rualin an sihphurh sut tumin tum tam tak Vengthlang North goal thleng phei thin mah se, Vengthlang North Keeper Lalruatsanga an paltlang thei lo, Lalruatsanga hian tum eng emaw zat Vengthlang North hi a chhanhim a, Kahrawt hi an vanduaini a ti loh theih loh a, goal kham an pet per leh goal khung theihna hun tha an neih an hman tangkai theih tak loh te kha an vanneihni chu nise chakpui na tham a ni. Hun tawp thlenga goal dang luh belh loin Vengthlang North-in si 1 faia hnehna changin Semfinal an inhlangkai ta a ni. He inkhelah hian Vengthlang North goal keeper Lalruatsanga chu man of the match-ah thlan a ni.
Semifinal hi Ni 28-ah khelh a ni ang a, dar 12:00 ah Zokhawthar leh Venglai an inkhel ang a, dar 2;30-ah New Champhai leh Vengthlang North an inkhel bawk ang.
