Kum 2023 November ni 30-a Central Women Jail, Aizawl atanga tlan chhuak Lalchhanmawii ni ngeia hriat chu vawiin khan Champhai Police-in an man.
Champhai Police-te sawi danin May ni 8, Nilaini khan Champhai Police-te hian Chalbawia Junction, Champhai Police Check Gate-ah mi 4, Lallawmsanga, Mission Veng Aizawl ni-a insawi, Lalhruaizeli leh Laldingngheti Aizawl Zuangtui ni-a insawi leh C Lianhmingthanga, Aizawl Zemabawk ni-a insawite hnen atangin Heroin Hawng 22, Gram 250 an man a, heng ruihhlo tawlhrutua puhte hian Lalchhanmawii hnen atanga an lak niin an sawi a. He mi hm alamah pawh hian Lalchhanmawii hian Myanmar atangin Mizoram lamah ruihhlo a rawn tawlh lut thin tih Police-te hian hre tawhin man tumin veh thin mah se, ram danga awm a nih avangin man theih a ni lo a. Nilaini-a ruihhlo tawlha puhte hnen atang hian a phone number hria-in a awmna chin an chhui a. Vawiin khan Champhai khawpui chhungah a awm tih an hriat avangin man tumin an veh a, Champhai chhuahsana Khawzawl pan a tum laiin Mizofed Petrol Pump leh Khankhawn Police Checkgate inkarah an man ta a ni.
November ni 30, 2023 zing dar 1:00 leh dar 2:00 inkar vel khan Central Women Jail atang hian hmeichhe pathum vawiina man tak Lalchhanmawii leh mi dang pahnih Lalruatsangi leh Niengbol-te chuan Blanket leh puan suih zawmin, Jail bangah uai thlain an tlan chhuak a, mi dang pahnihte erawh hi chu man an la ni lo thung a ni.
Lalchhanmawii hian Lalpekmawii a nih thu leh Central Jail atanga tlanchhuak a nih loh thu Police hmaah a sawi a ni.
