Assam Rifles te puaktheithil manah a neitu man tur an awm lo

Thawhlehni chawhma dar 10:00 a 23 Assam Rifles, Serchhip ten Farkawna puaktheithil thahnem tak an manah a neitu man tur an awm lo. Hemi chungchang hi Maipawl chuan chhuizauna a nei.

An thil man:

Thawhlehni khan Aizawl atanga bungraw rawn kal chu Farkawn lirtheiah hlan a ni a. Buhfai leh purun bag te bakah tel case te niin a lang. Heng bungraw thiar lai hi lirthei neitu leh driver ni bawk chuan a hmuhpui lova, bungraw neitu hian hmuhpui a phal lo niin Police officer pakhat, a hming puanzar remti lo chuan Maipawl a hrilh.

Bungrua hi Farkawn atangin Indo-Myanmar ramri lam panpui a ni a. An kalna kawngah hian raltlan, Mizorama rawn luh tum, hrileng inkaihhruaina avanga rawn lut thei lo mi engemaw zat an inkhuar a. Tiau lui pelh chiahin Chin National Front (CNF) hmunpui Camp Victoria chu a awm bawk. Lirthei hi a thil phurh atangin raltlante hnena tanpuina pe tur niin a lang.

Farkawn khaw daia duty Assam Rifles te chuan he lirthei hi an lo endik a, puakthei thil thahnem tak an man zui ta a. Buhfai leh purun bag inkarah zen ton 1.3 hmuh chhuah a ni a, bag 63 ah dah a ni. Tel bawm atang hian a tihpuahna tur 3000, electric hmang chi 921 leh safety fuse metre 2000 te an man tel bawk.

Puaktheithilte hi he kawngin a zuk pawh awmchhun chu Camp Victoria a nih avangin CNF te hnena thleng tur ang sawizawm a ni a. Assam Rifles, Police leh Farkawn khawtlang hruaitute chuan chu chu thil nihdan tur awm ber nia an ngaih thu an sawi. Puaktheithilte hi an thup tha lem lo, han hai deuh chuan hmih maitheih tur a ni tih thudawnna chuan a sawi.

Mi 2 an man tel

Heng puakthei an man kaihhnawihah hian lirthei neitu chauh a tirah man tel a ni. Lorthei neitu hian a thil phurhah Puaktheithil a awm leh awm loh a hriat thu a mantu Assam Rifles te a hrilh a. Bungraw neitua inchhal, Aizawl district a mi chuan hei hi nemnghetin a ta a nih thu a sawi a. Heti chung hian Bungraw neitua inchhal chu man tumna a awm chuang lo niin police pakhat chuan Maipawl a hrilh.

Chawhma dar 10 a man ni tawh mah se thubuai siam a, chhuizui turin police te kutah hlan a ni lawk lo thung a. Zan 9:30 bawr velah chauh Dungtlang Police station-ah FIR ziahluh a ni a. FIR-ah hian bungraw phurtu leh a neitu nia inchhalte chu mawhphurtu angin tarlan a ni.

Puaktheithil an man leh FIR thehluh inkarah hian bungraw neitua inchhal chuan Champhai District court atangin interim bail-a chhuah dilna a la hman a, hei vang hian man theih a ni ta lova. Lirthei neitu chu police ten kawl mah se inhnamhnawihna a nei lo nia a lan avangin chhuah a ni dawn tiin Maipawl thudawnna chuan a sawi.

---

Tu ta nge?

Heng puaktheithilte hi Aizawl atanga phurh a nih a rinawm thu a chhuitu zinga mi hnen atangin thudawn a ni a. A neituah hian Aizawla cheng mi pahnih chu thu zawhfiahna atangin rinhlelh an nei a, an awmna bial police station-ah lo ngaihven tura thu thlen a ni tawh.

Hetihlai hian police leh intelligence te thudawn a inang lova. Police te rinhlelh pakhat chu intelligence te hian puaktheithil phurh a ni tih hrilhtu zawk niin an hre thung. “An man tirh atangin he thubuai hi hnawk hle. FIR thehluh a nih lawk loh avangin bail an lo la hman tawh nen, a neitu tak pawh chhui chhuah a har maithei.” tiin Maipawl thudawnna chuan a sawi.

Puaktheithil man chungchang hi national leh international media te chuan an ngaihven hle a. Media thenkhat chuan Mizoram chu a ruka sumdawnna hluarna hmun kumkhua angin an chhuah.

AR thil man a rintlak em?

Assam Rifles hian ramriah ralthuam leh thil dang tawlhruk man an lo nei fo tawh a. An thil manah hian a neitu awm lo a tam hle. Kuhva rah tlawh vanglai, kumin March thla khan Serchhipa inkhuarte Assam Rifles te hian Bulfekzawl ramah kuhva trip khat an man niin an sawi a. Mahse Bulfekzawl khawtlang hruaitute chuan an ramah kuhva man thawm engmah an hriat loh thu an sawi thung. Hei vang hian an thil mante hi a rintlak takzet em? Hmingthat duh leh promotion duh avanga man anga an chhuah a awm nual lo maw? tih hi ramri depa chengten hun rei tak atang tawha an zawhna a ni.