Vanlalhmuaka chuan Mizoramah ZPM Sorkar thar a lo piang ta a, Sorkar thar hian an intiam ang ngeia ‘Mipui Sorkar’ an siam an beisei thu a sawi a; BJP chu Mizoram leh Hnam tana ding an nih avangin Sorkar thar lo piang pawh an tlinlohna leh fellohna ringawt chhuia bei lovin, Constructive Opposition Role Play turin BJP MLA-te pawh an inbuatsaih ngei an beisei thu sawiin ZPM hian Mizoram siam ṭha tura an intiam angte an tihlawhtlin ngei theih nan duhsakna an hlan tih a sawi a. Mizoram mipui pawhin ZPM Sorkar an enna tur chu an thutiam ah an ding em? Mizoram tana tih tura an puanchhuah ang leh an Manifesto ang te chu an hlenchhuak em? tih chu Mizoram mipui hian Sorkar ṭha an tehna tur a ni a, an intiam anga hna an thawh a, an Manifesto an tihhlawhtlin chuan Result ṭha tak an nei tih a lo lang mai dawn niin a sawi bawk.
Vanlalhmuaka chuan BJP-in an Manifesto neih Mizoram mipui tana an duante tih theih a nih dawn tak loh avangin pawi an ti hle tih sawiin ZMC ringawt pawh RIMS-a Upgrade tura an tih chu ti thei dinhmuna an din tak loh avangin Phai lam pan ngai ṭhinte’n an la pan fo a ngai leh dawn ta niin a sawi a; an Manifesto-a an tarlan Mizoram hmasawnna tur atana an duan Central-in a hriatpuite chu Mizoram mipuite’n an la mamawh loh avangin, mamawh hun an neih veleh Mipui zarah Sorkarna an la chang ve ngei niin a sawi bawk.