India leh Myanmar in kal pawhna Zokhawthar lei chu vawiin atangin hawn ni mah se, a hma angin zalen takin a inkal pawh theih tawh loh.
Lok Sabha MP inthlan avanga Myanmar leh India inkal pawhna Zokhawthar Lei ni 2 chhung khar chu vawiin khan hawn a ni a, hetih lai hian inthlan hmaa gate khar hma ang erawh chuan zalen taka inkal pawh a theih tawh loh thung.
Zokhawthar Branch YMA President-in Maipawl hrilh danin vawiin khan Assam Rifles Commandant-in Zokhawthar a tlawh a, khawtlang hruaitute nen an inkawmnaah Assam Rifles hotute chuan Gate hi hawn leh ni mah se, a hma angin a inkal pawh theih tawh dawn loh niin an sawi a, dam lohna thil te, zirlai leh rikrum thil thleng tih loh thil dangah chuan inkal pawh pawh phal a ni tawh dawn lo a, Lei bakah hian Tiau Luia inkal pawhna dang pawh Assam Rilfes-te hian uluk takin an veng zui dawn tih an sawi bawk a, hei hi April ni 30 thleng kalpui a ni ang a, May ni 1 atang erawh chuan Inkal pawhna hi khar tawp a ni tawh dawn niin an sawi bawk.
Zokhawthar khawtlang hruaitute’n ram pahnihte zalen taka an inkal pawh theihna Free Movenment Regime chu tih tawp a ni dawn em tih an zawhna chu Assam Rilfes hotute chuan an chhan theih loh thu sawiin an hotute thupek bawhzui mai an nih thuin an chhang a ni.
Assam Rilfes hotute chuan Zokhawthar khawtlang hruaitute nena an inbiakna hi Myanmara Mipui sipai Hualngoram PDF leh Tiau Youth Association lamte hrilh turin an ngen bawk a ni.
Hetih lai hian Nimin tlaia India leh Myanmar inkal pawhna Zokhawthar Lei khar mek hawn tumna avanga buaina chhuak anga sawi chu Tiau Youth Association hruaitute chuan thu dik lo a nih thu an sawi a.
Nimin tlai dar 5:00 vel khan lei hawn phut hian Zokhawthar leh Khawmawi mipuite an pungkhawm niin thu thehdarh a ni a, hemi chungchangah hian Maipawl Zawhna chhangin Pu Mahneha, Tio Youth Association hruaitu chuan nimin tlai-ah Assam Rifles-in an ko khawm a, Zokhawthar lam pawh VC-te kaltlangin an ko khawm bawk ni-a sawiin Assam Rifles hian thu leh awm hma chu in kalpawhna lei hi mihring leh bungraw lut theih lo tura khar a nih thu an hrilh niin a sawi a. Mipuiin gate hawn luih an tum ni-a sawi chu dawt hulhual a nih thu sawiin buaina engmah chhuah a awm loh thu leh he thu thang hi Assam Rifles lamin an thehdarh ni-a a rin thu a sawi bawk.
Zokhawthar khawtlang hruaitute pawhin thu thehdarh chungchangah thu dik a ni em tih finfiah hmasak thin nise an duh thu an sawi ve bawk.