Vawiin khan Zawlsei khuaa raltlan awmna tur Relief Camp sak mek chung tur Rangva Bundle 24 chu Champhai Sub-Headquarters YMA te’n dahin raltlan tanpui nan cheng Nuai 1 chu Tuipuiral Group YMA kutah an hlan.
Champhai Sub-Headquarters YMA hruaitute chuan tukin khan Tuipuiral tlangdung khaw hrang hrang tlawhin raltlan dinhmun an enfiah a. Champhai District Bawrhsap ruahman angin DM&R atanga ruahman rangva bundle 24 keng nghalin Central YMA atanga cheng Nuai 1 raltlan tana ruahman chu a bo a bâng awm lovin Tuipuiral Group YMA hruaitute hnenah an hlan nghal bawk.
Champhai Sub-Headquarters YMA hruaitute chuan Myanmar atanga raltlante chu dinhmun harsa deuha an lo awm a nih pawhin chhel taka awm tur leh YMA chuan a theihna zawnah hma lak sel a tum tih Sub-headquarters President Pu F Lalrinmuana chuan a sawi a. Tuipuiral Group YMA ten pa chan changa a thim avar thlu lova raltlan an lo buaipuinaah lawmthu a sawi.