Mizoram inthlanpui vote chhiar tura inbuatsaihna chuan a vawrtawp a thleng tan a, vawiin khan Champhaiah vote chhiar turte tana training hnuhnung ber neih a ni.
Mizoram Legislative Assembly Inthlanpui, 2023-a Champhai District huamchhunga Assembly Constituency pathuma vote tlate chhiar tura ruat Counting Supervisor leh Counting Assistant te tan Champhai DC Conference Hall, Keifangtlang-ah vawiin khan Training hnuhnung ber buatsaih a ni a; Champhai District-a Assembly Constituency pathuma vote tlate chhiar tur hian Counting Supervisor leh Counting Assistant 29 theuh ruat an ni.
Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 atangin DC Office, Keifangtlanga Counting Hall pathumah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni a.
Vawiin vek khan Observer-te thachhang dawltu Micro Observer-te tan training hnuhnung ber buatsaih a ni bawk a, Micro Observer-te hi Vote chhiar lai ngun taka lo en thlithlaitu niin Observer-te thachhang dawltu an ni a. Counting Hall-ah vote tla zat uluk taka lo en a, Form siamsa hmanga Observer hnena report petu an ni. Postal Ballot chhiarna leh EVM Vote tla chhiarna dawhkan tinah Micro Observer pakhat zel an duty dawn a, hemi bakah hian Observer tin te bulah anmahni puitu tur Micro Observer pahnih ruat an ni bawk a ni.
Champhai District-a Micro Observer tur atan hian mi 36 te ruat an ni a, Sawrkar Laipui kaihhnawih hna chelh te an ni.