Tuipuiral Group YMA Rorel Inkhawm vawi 5-na chuan Myanmar atanga ruihhlo lut nasa lutuk chu nasa zawka beihpui thlaka PDF, CDF leh CNF te nen tanho dan ngaihtuah ni se an ti.
Tuipuiral Group YMA Rorel Inkhawm vawi 5-na hi vawiin khan Vaphai Community Hall neih a ni a; Rorel inkhawm hi Tuipuiral Group YMA President Pu B Challianngura’n a kaihruai a, Sawrkar khawih Agenda 4 leh YMA khawih Agenda 3 ngaihtuah a ni a, Agenda zingah hian Myanmar atanga ruihhlo lut nasa lutuk chu nasa zawka beihpui thlaka PDF, CDF leh CNF te nen tanho dan ngaihtuah ni se tih te, Tuipuiral huam chhunga PHC te tichangtlung tura hmalak chungchang te, Ramri hung na taka dodal leh CYMA in kutdawh pung tual tual zirchiang tura thlen chungchangte a tel a ni.
Vawiina Tuipuiral Group YMA Rorel Inkhawmah hian chawhma lamah member boral sunna hun Tuipuiral Group YMA Founder OB Upa T Zabuanga’n hmangin member 104 zet sun ngaia an awm chu lungchhiat thlak a tih thu sawiin Mizorama YMA member ni rual thi hnem lutuk chu ram leh hnam dinhmun tiderthawngtu a nih avangin YMA member te tan la turin a fuih a. Pu MC Lalramenga’n kum puan ‘Ram leh hnam humhalh’ thupui sawiin kum puan a hawng a. Inthlah pun, ei leh bara intodelh, nungcha leh ram ngaw humhalh, zirna hmanga hmasawn tih thupui hmangin ‘ram leh hnam humhalh dan tur a sawi bawk. Chawhma inkhawm hi Vice President Pu Lallawmawma Tlau-in a kaihruai a ni.