Laltlanzova S/o Lalhmingliana, Champhai Tlangsam, chuan September ni 7, 2024 (Inrinni) chhun dar 12:00 vel khan Khawzawl tlangval, Mesak Vanlalremruata (I sem) Govt. Khawzawl College zirlai chu Dulte thlang, Dulte leh Tuivawl inkara Dilmawi an tih hmun a tui tla chu him takin a chhanchhuak.
Hemi ni chhun dar 12:00 velah hian Khawzawl Govt.College zirlai NCC Camp, Tanhrila kal hawng lam mi 10 vel chu Dilmawiah hian an inchiah dai a, hemi hnu lawk hian Aizawl tleirawl pahnih pawh hemi hmuna tuicheng turin an rawn kal ve bawk a ni.Chutia tui an chen lai chuan Khawzawl tlangval pakhat Mesaka an tih chu tuiah a tla tih a thianpa chuan midangte a hrilh a, tuicheng ve dangte chuan tui tla an awm tih pawh an hre lawk lo. An inkokhawm a, an inchhiar a, mi pakhat a kim lo tih an hria a, an thawm riva hriain kawngpui sir, Waiting Shed a lo chawl hahdam mek, Laltlanzova S/o Lalhmingliana, Champhai Tlangsam chuan a zuk pan hnai a, “Khawi laiah nge in hmuh tawpna” tiin a zawt a, Tlangval pakhat chuan “helaiah hian a pil” tiin a thianpa tlakna lai a kawhhmuh a,rang takin Laltlanzova chuan tui liluhin a zuk dap a, a hmuh fuh theih mai loh avangin vawi 4 a luhnaah chuan a zuk khawih fuh a, Tui feet 8 vela thuk mawnga a bawkkhup zawnga lo awm Mesak Vanlalremruata chu a zuk lachhuak ta a, a lakchhuah hlim chuan a pum a puar hman tawh a, a hmui a duk vek a, a thaw pawh a awm tawh lova, a thi fel der tawh ah an ngai hial a ni.
Mesaka Vanlalremruata thawk tir leh a turin zirlai rualho chuan an thiam ang angin hma an la a, CPR(Cardiopulmonary resuscitation) uar taka tiin a hnu rei vak lovah chuan a rawn thaw chhuak ve leh thei ta a, Kawlkulh damdawiin an panpui a ni a, Oxygen te pek a niin
Aizawl ah refer zui niin hemi zan vek atang hian Civil Hospital Aizawlah ICU ah admit ni in tun thleng hian ICU ah enkawl a la ni.
Mahni nunna pawh thap ngam a, tlangval Mesak Vanlalremruata li mawnga bawkkhupa lo awm reng tawh lachhuaktu Laltlanzova S/o Lalhmingliana. Champhai Tlangsam hi huaisen lawmman pek tlak a ni ngei ang.