Home Minister K Sapdanga chuan tukina thi-a hmuh V. Lalhmingthangi, Tuikual South thattu ni ngeia rin Irene Lallawmzuali (34), Ramthar North a cheng mek chu Zemabawk Dinthar venga a thiannu inah man a nih thu a sawi
K. Sapdanga sawi danin tukin khan Zothanmawia (64) Tuikual South veng chuan Aizawl Police Station-ah a nupui Pi V Lalhmingthangi, Aizawl New Market a VLH Variety Store neitu chu zan a a rawn haw loh report siam a tum laiin, a fapa in a nu Pi V Lalhmingthangi ruang chu a dawr chhungah thi in an hmuh thu a hrilh tih a sawi a.
Report dawn a nih velah hian Mizoram Police leh Forensic team-te chu, ruang awmna dawrah kal ngalin,ngawrh takin hnu chhui tan nghal a ni a. A hmun a thil awmdan leh he thil thleng chhungchanga thu hriat nei awm angte statement atangin Police team hrang hrang insem darh chuan a titu ni ngei a rinhlelh Irene Lallawmzuali (34) w/o Lallungmuana, Ramthar North a cheng mek chu Zemabawk Dinthar veng a a thiannu in atanga man nghal a ni.
Minister chuan an mi rinhlelh man kut atang hian tualthahna atan a hman ni ngei a lang, chemte leh tualthita thil neih ni ngei a lang engemawzat man tel a nih thu sawiin an mi rinhlelhin Police hma a a thusawi atang chuan ama tih ngei ni-a a lan thu a sawi.
V Lalhmingthangi ruang hi postmortem fel tawh a ni a, hnu chhui tur tam tak la awmte pawh, a tahtawl a, uluk tak a chhui zui leh vek tur a ni.
Thiltisualtu in thiamloh a chan ngei theih nan mipuiten theih tawp a Police-te hnuchuinaa pui turin Home Minister hian a sawm a, hnuchuina ti thuanawp thei tur thil tilo turin a ngen bawk a ni. Aizawl PS-ah Case No 87/24 Dt 17.03.2024 u/s 302/201/380 IPC siam a ni.