June 26, 2024 : Nimin tlaia Tiau luia tla Malsawmsanga kum 22 mi, Champhai dinthar veng chu vawiin khan zawn chhunzawm a ni a, chanchin buatsaih lai thlengin hmuh a la ni lo.
Malsawmtluanga, Champhai Dinthar veng hi Zokhawtharah in sa-a inhlawhin hna an thawk a, nimin chawhnu lam khan Tiau luiah inchiah dai turin a thiante nen an kal a, tlai dar 3:30 vel khan Zokhawthar Lei chhak Balu kaiah chesualin tuiah hian a tla zui ta a ni.
Nimin tlai khan Zokhawthar leh Dinthar khawtlangte chuan an zawng nghal a, tlai dar 6:30 thleng khan hmuh a ni lo a, tui a la khauh avangin tui tla zawn hna hi chawlh laiawk rih a ni a, nizan lamah Bulfekzawl khawtlangin an huam chhung Ngar hemin an tlaivar a, Sesih lamin an huam chhung chin Tiau luiah tui tla hi an lo zawng ve bawk a ni. Vawiin lamah Zokhawthar, Dinthar, Khawmawi (Myanmar), Bulfekzawl, Melbuk leh Hruaikawn khawtlangin an zawn chhunzawm a, chanchin buatsaih lai thlengin hmuh a la ni lo a. Zaninah Bulfekzawl branch YMA-te Lungreng kaiah an an tlaivar ang a, naktukah Zokhawthar tuithiamin Zokhawthar atangin an zawng thla leh ang a, Bulfekzawl leh Branch dang zawngin a thlang lam an zawng leh dawn a ni.
Vawiin khan District Disaster Management Authority hotute chuan tui tla zawnna hmun hi an pan a, Pawisa fai Cheng Sang 2, Silpauline 4 leh eitur chi hrang hrang an pe a, Champhai South bialtu MLA Lt. Col. Clement Lalhmingthanga chuan tui tla zawngte thingpui inna turin Cheng 5000 a hlan a; SYMA Champhai Disaster Committee leh Vanhnuailiana Group YMA hruaitute’n tui tla zawngtute hi an tawiawm bawk a ni.