June 27, 2024 : Vawiin chawhma dar 11:00 vel khan Tiau Lui – Ui Luiah mi pali-in Balu an lakna khur Feet 40 vela sei, Feet 6 a zau leh Feet 7 vela thuk chu a chim a, khur chhunga awm mi 4 – te chu a chhilh a, a bul hnaia hnathawka awmte chuan chhanchhuah hna an thawk nghal a, a hmunah hian mi pahnih Lalmalsawmdawnga kum 16 mi, Pu Samuela fapa Melbuk khua leh Laltandika, Pu Liankhawnanga, Tahan Myanmar raltlanga Melbuka awm mekte chu ka pawh chhawn loin an thi nghal a. Hliam tuar mi pahnih Lalmuankima kum 18 mi leh a nau Lawmsanga, Pu Lenkhupa fapa Melbuk khuate chu Damdawi in panpui nghal an ni a, Lalmuankima zawk hi a hliam tuar loin kawng lakah a thi ve leh a, Lawmsanga hi Med Aim Hospital-ah enkawl mek a ni a, a dinhmun a ngaihtuahawm lutuk lo thung.
Laltandika ruang hi an khua Tahanah phurh chhoh tura buaipui mek a ni a, Lalmalsawmdawnga leh Lalmuankima te ruang hi zanina lumen a ni ang a, naktukah vui liam an ni ang. Laltandika ruang hi Melbuka vuiliam tur a nih chuan an pathum hian a rualin hmun khatah vuiliam tum a nih thu Melbuk khawtlang hruaitute chuan Maipawl an hrilh